सामग्री खोज्नुहोस्

सिनेमाप्रति मानिसको इन्ट्रेस कम हुनु र एकले अर्काको खुट्टा तान्ने प्रवृति पनि बढी भएकाले जापानमा सिनेमा चलाउन कठिन

उपेन्द्र थापा/टोकियो

जापानको अध्यागमन बिभागको पछिल्लो तथ्याङ्क अनुसार जापानमा नेपालीहरुको संख्या १ लाख २५ हजार ७९८ रहेको छ । जसमा राजधानी टोकियोमा बसोबास गर्ने नेपालीहरुको संख्या २६ हजार ६४३ रहेको छ । सबै भन्दा धेरै नेपालीहरु बसोबास गर्ने क्षेत्रनै टोकियो हो ।

जनसंख्याका हिसाबले १ लाख २५ हजार त्यति ठुलो संख्या होइन तर पनि पछिल्लो समय जापानमा नेपाली चलचित्रहरु प्रदर्शन गर्ने क्रम अत्यन्तै तीब्र बनेको छ । हाल सम्म जापानमा कबड्डी ४, प्रकाश, प्रेम गीत ३, लाखे, महा पुरुष लगायतका चलचित्र टोकियो सहितका शहरमा प्रदर्शन भैसकेका छन् ।

कोरोना महामारीको लहर पूर्ण रुपमा नियन्त्रणमा नआउदै जापानले लामो समय देखिको आपतकाल अन्त्य गर्र्यो । आपत्कालको अन्त्य संगै जापानका विभिन्न शहरमा नेपाली चलचित्र कबड्डी ४ प्रदर्शन भयो । टोकियोको नाकानो जेरो हलमा कबड्डी ४ हेर्न दर्शकहरुको भीड थामी नसक्नु हुँदा आयोजकले कतिपयलाई टिकटको पैसा फिर्ता दिनुपरेको थियो ।

‘जापानमा कबड्डी ४ इतिहास हो’ चलचित्र पत्रकार एवं छड्के २ का जापान वितरक सचिन आचार्यले भने ‘कबड्डी ४ को रेकर्ड तोड्न लामो समयको प्रतिक्षा गर्नुपर्ने हुन्छ जस्तो मलाइ लाग्दछ ।’ सिनेमाप्रति मानिसको इन्ट्रेस कम हुनु र एकले अर्काको खुट्टा तान्ने प्रवृति पनि बढी भएकाले जापानमा सिनेमा चलाउन कठिन भएको आचार्य बताउछन ।

नेपालमा ‘हिट’ भएको महापुरुष र सामाजिक रुपमा राम्रो चर्चा पाएको प्रकाशले समेत जापानमा खासै प्रभाब पार्न सकेन । त्यसैले पनि जापानमा नेपाली चलचित्रले बजार बिस्तार गर्नेकुरामा वितरकहरु ढुक्क छैनन् ।

परीक्षाको संघारमा छड्के २ र छक्का पन्जा ४

जापानमा प्रदर्शनको तयारीमा रहेका दुइ चलचित्र हुन् छड्के २ र छक्का पन्जा ४ । नमस्ते टोकियोले वितरण गरेको छड्के २ राजधानी टोकियो सहित निगाता, तोचिगी, सेन्दाई, चिवा, ओसाका, कोबे, फुकुयामा, फुकुओका, ओकिनवा लगायतका क्षेत्रमा प्रदशन हुँदैछ । त्यसैगरी आनभि इण्टरटेण्ट्मेण्टको वितरणमा रहेको छक्का पन्जा ४ पनि टोकियो सहित चिवा लगायतका ठुला शहरमा प्रदर्शन हुंदैछ ।

छड्के २ र छक्का पन्जा ४ नेपालमा बहुप्रतिक्षित चलचित्र हुन् । छड्के २ मा नायक अनमोल केसी नया लुक्समा देखिएको र छड्के ४ पहिले देखिकै सिरिज भएकाले प्रतिक्षारत चलचित्र हो । टोकियोको नाकानो हलमा छड्के २ मार्च ५ र छक्का पन्जा ४ मार्च १२ मा प्रदर्शन हुँदैछ । यी २ चलचित्रले जापानमा कस्तो प्रभाब पार्छन त्यो भने चलचित्र प्रदर्शन पछिनै थाह हुनेछ।

छड्के २ चिवाका २ ठाउँ र छक्का पन्जा नारितामा प्रदर्शन हुने

छड्के २ टोकियो नजिकको चिवा प्रिफेक्चरका २ स्थानमा प्रदर्शन गरिदैछ भने छक्का पन्जा ४ चिबाको नारितामा प्रदर्शन हुने आयोजकले जनाएका छन् । नमस्ते टोकियोका सचिन आचार्यले दिएको जानाकारी अनुसार चिबाको फुनाबासी र नारितामा प्रदर्शन हुने भएको हो ।

छड्के २ लाइ फुनाबासीमा एनआरएनए चिवाले मार्च १२ र नारितामा दौतरी जापानले मार्च १८ तारिख प्रदर्शनको मिति तय गरेका छन् । त्यस्तै छक्का पन्जा ४ नारितामा १२ मार्चमा लाग्दैछ । अध्यागमनको पछिल्लो तथ्याङ्क अनुसार नारितामा नेपालीहरुको संख्या ९६० छ भने त्यहाँ १ हप्ताको अन्तरालमा दुइ चलचित्र प्रदर्शनमा आउदैछन ।

नारितामा छक्का पन्जाको प्रदर्शन जिम्मा नारिता नेपालले लिएको हो । ‘आन्तरिक रुपमा तयारी गरिरहेकै छौ’ नारिता नेपालका नबिन राउतले भने ‘सानो क्षेत्रमा चलचित्र प्रदर्शन गर्नु चुनौतीपूर्ण त छ तर पनि बिस्तारै माहोल बनाउने हाम्रो कोसिस हुनेछ ।’