सामग्री खोज्नुहोस्

एजेन्सी । ​लिबियाको त्रिपोली क्षेत्रबाट १ हजार ५०० आप्रवासी कामदार पक्राउ परेका छन् ।​ 

लिबियाली अधिकारीहरूले राजधानी त्रिपोलीको पूर्वमा रहेको एक वस्तीमा शनिबार छापा मारी करिब १ हजार ५०० कागजातविहीन आप्रवासी कामदारहरूलाई पक्राउ गरेका हुन् ।

शनिबारको अनुगमनमा कागजातविहीन विदेशी कामदार बस्ने घरहरू फेला परेका हुन् । ‘विभिन्न देशका यी कामदारहरूसँग आवासीय अनुमति, आधिकारिक राहदानी र स्वास्थ्यसम्बन्धी कुनै रेकर्ड थिएन’, एक अधिकारीले भने ।​ 

लिबियामा सन् २०११ मा नेटो समर्थित विद्रोहमा लामो समयदेखि सत्तामा रहेका मोआमेर कद्दाफीलाई सत्ताच्युत गरी हत्या गरिएपछि लिबिया द्वन्द्वको चपेटामा परेको छ ।​

त्रिपोलीस्थित प्रधानमन्त्री अब्देल हामिद देबेइबाको सरकार र पूर्वमा रहेको प्रतिद्वन्द्वी प्रशासनबीच देश विभाजित छ ।

इटालीबाट करिब ३०० किलोमिटर टाढा रहेको लिबिया समुद्रमा आफ्नो ज्यानको जोखिम मोलेर युरोप पुग्ने हजारौं आप्रवासीका लागि प्रमुख ‘शुरूवात विन्दु’ बनेको छ ।​

त्रिपोलीको पूर्वतिर लक्षित उक्त क्षेत्रमा अग्ला पर्खाल र ठूलो ढोकाले घेरिएको अस्थायी शिविरहरू रहेका छन् ।

अधिकांश इजिप्ट र उप–सहारा अफ्रिकी मुलु्कका सयौं आप्रवासीहरू त्यहाँ बसोबास गर्ने गरेको पाइएको अधिकारीहरूले बताएका छन् ।