सामग्री खोज्नुहोस्

काठमाडौं । एकदिवसीय अन्तर्राष्ट्रिय क्रिकेट शृङ्खलाको पहिलो खेलमा नेपालले रोमाञ्चक जीत हासिल गरेको छ । कीर्तिपुरस्थित त्रिवि क्रिकेट मैदानमा पाहुना टोली क्यानडाविरूद्धको खेलमा जीतका लागि कप्तान रोहित पौडेल एक्लैले ४ विकेट लिएका थिए ।

क्यानडा–नेपाल एकदिवसीय क्रिकेट शृङ्खलाको पहिलो खेलमा बिहीबार टस जितेर पहिले ब्याटिङ रोजेको नेपालले निर्धारित ५० ओभरमा सबै विकेट गुमाएर २२४ रन बनाएको थियो ।

सामान्य लक्ष्य पछ्याएको क्यानडा ४७ दशमलव ५ ओभरमा सबै विकेट गुमाउँदै २ सय १७ रनमा सीमित भयो ।

क्यानडाका लागि निकोलस कीर्तनले ९९ बलमा सात चौकाको मद्दतमा ६८ रन बनाए भने पर्गत सिंहले ५० र हर्श थाकरले ३२ रनको योगदान दिए । तर अन्य खेलाडीले उल्लेख्य योगदान गर्न नसक्दा पहिलो खेलमा जीत दर्ता गर्नबाट चुक्यो ।

यता नेपालका लागि कप्तान पौडेल एक्लैले चार र ललित राजबंशीले २ विकेट लिए । त्यसैगरी सोमपाल कामी, रिजन ढकाल, पवन शर्राफ र कुशल मल्लले समान १/१ विकेट लिए ।

जीतसँगै नेपालले तीन खेलको शृङ्खलामा १–० को अग्रता बनाएको छ ।

नेपाल र क्यानडाबीचको दोस्रो खेल यही माघ २७ हुनेछ ।