सामग्री खोज्नुहोस्

एजेन्सी । प्यालेस्टाइनी लडाकू समूह हमासले इजरायलमा हवाई, समुद्री र स्थल आक्रमण गरेको छ ।

शनिबार बिहानदेखि भएको आक्रमणमा कम्तीमा १०० इजरायलीको मृत्यु भएको इजरायली स्वास्थ्य मन्त्रालयले जनाएको छ । आक्रमणमा परी कम्तीमा ७०० इजरायली नागरिक घाइते भएको जनाइएको छ ।

यसैगरी इजरायलको जवाफी आक्रमणमा परी करिब २०० प्यालेस्टाइनीको मृत्यु भएको छ । साथै एक हजारभन्दा बढी घाइते भएका विवरणहरु पनि सार्वजनिक भएका छन् ।

नेपालको परराष्ट्र मन्त्रालयले दिएको जानकारीअनुसार हमासको आक्रमणमा परी ९ जना नेपाली पनि घाइते भएका छन् । बंकर मुनि छिरेर ज्यान जोगाइरहेका उनीहरुले सरकारलाई छिटो उद्धार गरिदिन आग्रह गरेका छन् ।

इजरायलमा भएको आतंककारी हमलापछि त्यहाँ कार्यरत नेपाली त्रासमा रहेका छन् । निरन्तर प्यालेस्टाइनी आतंकारी समूहबाट रकेट प्रहारका साथै स्थलमार्गबाटै पनि आक्रमण हुँदा इजरायल अशान्त बनेको हो ।

आतंककारी हमलामा परी इजरायल प्यालेस्टाइनको सीमामा पर्ने गाजा क्षेत्रमा कार्यरत नेपालीहरु पनि घाइते भएका छन् । हालसम्म ९ जना घाइते भएको र उनीहरु उपचार पाउनबाट बञ्चित भएका छन् । बंकरमै घाइते अवस्थामा नेपालीहरु बस्न बाध्य भएका छन् ।

बाहिर निरन्तर भिडन्त भइरहेकाले उद्दारमा कठिनाइ भइरहेको इजरायलस्थित नेपाली दूतावासले जनाएको छ । हाल दुई जना अस्पताल पुग्न सफल भए पनि अन्यको भने उपचार हुन नसकेको हो । उनीहरुलाई अस्पताल लैजानका लागि निरन्तर पहल भइरहेको अस्पतालको भनाइ छ ।

बंकर छिर्ने क्रममा गोली तथा रकेटको छर्रा लागेका उनीहरुमध्ये केहीको अवस्था गम्भीर रहेको बताइएको छ ।

उनीहरु घाइतेहरु कृषि प्रशिक्षार्थी कामदार रहेको बताइएको छ । कृषि प्रशिक्षार्थीको रुपमा गएका १७ मध्ये ९ जना घटनामा परेका हुन् ।

इजरायलमा २ सय ५० कृषि विद्यार्थीसहित ४ हजार ५ सय जना नेपाली कार्यरत छन् ।