सामग्री खोज्नुहोस्

एजेन्सी । तान्जानियाले धानखेत जोगाउन तथा व्यावसायिक खेतीको अनुगमनका लागि ड्रोन र विमानको प्रयोग गरी लाखौं क्वेलिया चरा मारेको तान्जानियाका बोटबिरुवा र कीटनाशक औषधि निगरानी निकायले जनाएको छ । क्वेलिया रातो चुच्चो भएको भँगेराजस्तै देखिने ठूलो समूहमा घुम्ने पंक्षी हो ।

मरुभूमिको सलह नियन्त्रणको लागि पनि जिम्मेवार तान्जानिया बोटविरूवा स्वास्थ्य तथा किटनाशक प्राधिकरण (टीपीएचपीए)ले गत हप्ता लगभग एक हजार हेक्टरमा लगाइएका व्यावसायिक बालीहरू खतरामा परेको भन्दै मन्याराको उत्तरी क्षेत्रमा ५० लाख क्वेलिया चराहरू मारेको थियो ।

‘हामीले ५० लाख विनाशकारी चराको झुण्ड मारेका छौं र अब हामी अन्य क्षेत्रको निगरानी गरिरहेका छौं,’ टीपीएचपीएका कार्यवाहक महानिर्देशक जोसेफ नन्डुन्गुरुले भने ।

ठूला बगालमा ओहोरदोहोर गर्ने स–साना रातो चुच्चो भएका चराहरू बाली नाश गर्नका लागि कुख्यात छन् र सेप्टेम्बर र अक्टोबरमा सुख्खा यामको सुरुआतमा यिनीहरूको विगविगी हुने गर्छ ।

उत्तरी तान्जानियामा धानखेतमा क्षति पुर्‍याउनुअघि चार दिनसम्म हवाई आक्रमण गरी चराको झुण्डलाई निशाना बनाइएको एनडुनगुरुले बताए ।