सामग्री खोज्नुहोस्

काठमाडौं । संविधानसभाका अध्यक्ष एवं नेकपा एमालेका उपाध्यक्ष सुवासचन्द्र नेम्वाङको निधन भएको छ ।

सामान्य रुघाखोकी लागेर घरमा आराम गरिरहेका नेम्वाङकाे गएराति हृदयघातबाट निधन भएको हो ।

हृदयघात भएपछि उनलाई उपचारका लागि राति १ः ३० बजे त्रिवि शिक्षण अस्पताल लगिएका थियो । तर उनलाई अस्पताल पुर्‍याउँदा जीवनसम्बन्धी कुनै चाल नभेटिएको अस्पतालले जनाएको छ ।

बाथरुममा अचेत अवस्थामा भेटिएका नेम्वाङलाई राति साढे १ बजे टिचिङ अस्पताल पुर्‍याइएको थियो । तर अस्पताल पुर्‍याउँदासम्म उनको निधन भइसकेको थियो ।

विसं २००९ फागुन २८ गते जन्मिएका नेम्वाङले नेपाली राजनीतिमा शालीन र सबैलाई मिलाएर लैजान सक्ने नेताकोरुपमा छवि बनाएका थिए ।

नेम्वाङको निधनको शोकमा सरकारले बिहीबार सार्वजनिक बिदा दिएको छ । मंगलबार गृह मन्त्रालयले सूचना प्रकाशित गरी बिहीबार बिदा दिने जानकारी दिएको हो । सरकारले नेम्वाङको अन्त्येष्टि राजकीय सम्मानका साथ गर्ने निर्णय गरेको छ ।

श्रद्धाञ्जली अर्पणका लागि उनको पार्थिव शरीरलाई बुधबार दिउँसो १ बजेसम्म एमाले पार्टी कार्यालय च्यासलमा राखिने भएको छ ।