सामग्री खोज्नुहोस्

काठमाडौं । नेपाल चेम्बर अफ कमर्सले नेपालमा लगानीका लागि पहल गर्न जापानी सांसदलाई आग्रह गरेको छ ।

नेपालमा भ्रमणमा रहेका जापानी सांसदद्वय कोबायाशी काजुहिरो र नागइ मान्बुसँगको भेटमा चेम्बरले यस्तो आग्रह गरेको हो । नेपाल र जापानबीचको कूटनीतिक र आर्थिक सम्बन्ध ऐतिहासिक रहेकाले नेपालमा लगानीका लागि पहल गर्न आग्रह गरिएको चेम्बरले जनाएको छ ।

भेटमा चेम्बरका अध्यक्ष राजेन्द्र मल्लले जापानसँग नेपालको सम्बन्ध आर्थिक तथा व्यापारिक दृष्टिकोणले ऐतिहासिक रहेको बताएका थिए । “दुई मुलुकबीचको कूटनीतिक सम्बन्ध ७० वर्ष पुग्न लागेको छ, लगानी वृद्धि र व्यापारिक साझेदारीमार्फत आपसी सहकार्यलाई थप बलियो बनाउन आवश्यक छ”, उनले भने ।

स्वागत कार्यक्रममा जापानी सांसद काजुहिरोले नेपालमा ३० वर्ष अगाडि आएर लुम्बिनीमा वृक्षरोपण गरेको स्मरण गरे । नेपाल जापानबीचको आर्थिक र कूटनीतिक सम्बन्ध सधैं उत्कृष्ट रहेको उनको भनाइ थियो ।

अर्का सांसद मान्बुले दुई मुलुकबीचको आर्थिक र कूटनीतिक सम्बन्धलाई जनस्तरसम्मै पुर्‍याउनुपर्ने बताएका थिए ।