सामग्री खोज्नुहोस्

काठमाडौं । नक्कली शैक्षिक प्रमाणपत्र बनाएको आरोपमा नेपाली कांग्रेसका सांसद डा. सुनिल शर्मासहित पाँच जना पक्राउ परेका छन् ।

पक्राउ पर्नेमा डा. रामबाबु यादव, डा. रञ्जित यादव, डा. एलिना साह र डा. अमित चौधरी रहेका नेपाल प्रहरीको केन्द्रीय अनुसन्धान ब्यूरो (सीआईबी) ले जनाएको छ ।

सीआईबी प्रमुख, प्रहरी अतिरिक्त महानिरीक्षक किरण बज्राचार्यले सांसद शर्मासहित पाँच जनालाई पक्राउ गरिएको जानकारी दिइन्। पक्राउ परेका शर्मा मोरङ–३ बाट प्रतिनिधिसभामा निर्वाचित सांसद हुन् ।

अन्य डाक्टरहरू विभिन्न अस्पताल तथा मेडिकल कलेजमा कार्यरत रहेको जनाइएको छ । अहिले पनि सीआईबीको अपरेशन जारी छ ।

कतिपय चिकित्सकहरूले भारतीय नक्कली प्रमाणपत्र पेस गरी नेपाल मेडिकल काउन्सिलमा दर्ता भएको तथा काउन्सिलद्वारा सञ्चालन गर्ने दर्ता प्रमाणपत्र परीक्षामा सहभागी भएको पाइएकाले आवश्यक अनुसन्धान गरी पाउँ भनेर काउन्सिलबाट आएको सूचनाका आधारमा प्रहरीले अपरेशन चलाएको थियो ।

उनीहरू सबैमाथि शैक्षिक प्रमाणपत्र किर्तेमा अनुसन्धान भइरहेको ब्यूरोले जनाएको छ ।