सामग्री खोज्नुहोस्

एजेन्सी । भारतको मणिपुरमा साढे दुई महिनाभन्दा बढी समयदेखि हिंसा जारी छ । मणिपुरको राजधानी इम्फाल पूर्वमा दुई महिलामाथि क्रुर र अमानवीय घटना बाहिरिएपछि हिंसा भड्किएको हो ।

उनीहरूलाई निर्वस्त्र पारेर गाउँ डुलाइएर सामूहिक बलात्कारसमेत गरिएको थियो ।

पछिल्लो समय मेइती र कुकी समुदायबीच भइरहेको साम्प्रदायिक हिंसाबीच दुई महिलामाथि जघन्य अपराध गरेको भिडियोसमेत सामाजिक सञ्जालमा बाहिरिएको हो । भिडिओमा दुई कुकी महिलामाथि सामूहिक बलात्कार भएको देखिएको छ ।

युवाहरूको ठूलो भिडले ती महिलालाई निर्वस्त्र बनाएर गाउँ डुलाइरहेको देख्न सकिन्छ। भारतीय प्रहरीले भिडिओको पुष्टि गरेको छ । भारतीय सञ्चार माध्यमका अनुसार घटना ४ मेको हो । मणिपुरको थौबल जिल्लामा ती महिला यौन दुर्व्यवहारको सिकार भएको प्रहरीले बताएको छ। ​मणिपुर प्रहरीले दोषीलाई पक्राउ गर्न सक्दो प्रयास गरिरहेको बीबीसी हिन्दीले जनाएको छ ।

भिडिओमा देखिएकी एक महिलाको उमेर करिब १८ वर्ष र अर्की महिलाको उमेर ४० वर्ष रहेको समाचारमा उल्लेख छ। भिडिओमा दुई जना महिला मात्रै देखिन्छन् । तर भिडले ५० वर्षीया महिलालाई पनि निर्वस्त्र पारेर दुर्व्यवहार गरेको समाचारमा जनाइएको छ ।

यस एफआईआर अनुसार, पीडित महिला भन्छिन् – उनलाई मेइतेई महिलाहरूको समूहले पक्रेको थियो । जसलाई उनले मीरा पायबिस (महिला टर्चवाहकहरू) भनेर चिनिन्, जसलाई ‘मणिपुरका आमाहरू’ भनेर पनि चिनिन्छ र सशस्त्र पुरुषहरूको समूहलाई सुम्पिएको थियो।

बलात्कार पीडितलाई गम्भीर अवस्थामा छिमेकी राज्य नागाल्याण्डको अस्पतालमा भर्ना गरिएको थियो ।