सामग्री खोज्नुहोस्

काठमाडौं । सोलुखुम्बुमा मनाङ एयरको कल साईन (एन–एमभी–एएस–५०) हेलिकप्टर दुर्घटना हुँदा ६ जनाको मृत्यु भएको छ ।

सोलुखुम्बुको सुर्केबाट मंगलबार बिहान काठमाडौंका लागि उडेको हेलिकप्टर सोलुखुम्बुकै लिखुपिके गाउँपालिका–५ लाम्जुरापास नजिक दुर्घटनामा परेको हो ।

त्रिभुवन अन्तर्राष्ट्रिय विमानस्थलका महाप्रबन्धक प्रतापबाबु तिवारीका अनुसार दुर्घटनामा हेलिकप्टरका पाइलट क्याप्टेन चेतबहादुर गुरुङसहित ६ जनाको मृत्यु भएको हो । मृत्यु हुने अन्य ५ जना म्याक्सिकोका नागरिक रहेका छन् ।

सोलुखुम्बुको सुर्केबाट मंगलबार बिहान ९ बजेर ५२ मिनेटमा काठमाडौंका लागि उडेको हेलिकप्टर बिहान १० बजेर १ मिनेटपछि टावरसँग सम्पर्कविहीन भएको थियो । दुर्घटनामा ज्यान गुमाएका सबै जनाको शव काठमाडौं ल्याइएको छ ।

छानबिन गर्न समिति गठन

सरकारले हेलिकप्टर दुर्घटनाबारे छानबिन गर्न समिति गठन गरेको छ ।

सिंहदरबारस्थित प्रधानमन्त्री तथा मन्त्रिपरिषद्को कार्यालयमा बसेको मन्त्रिपरिषद्को बैठकले घटनाप्रति दुःख व्यक्त गर्दै छानबिन समिति गठन गरेको हो ।

मन्त्रिपरिषद्ले संस्कृति, पर्यटन तथा नागरिक उडड्यन मन्त्रालयका सहसचिव बुद्धिसागर लामिछानेको नेतृत्वमा छानबिन समिति गठन गरेको सञ्चार तथा सूचना प्रविधिमन्त्री रेखा शर्माले जानकारी दिइन् ।