सामग्री खोज्नुहोस्

एजेन्सी । बेलारूसका राष्ट्रपति अलेक्जेन्डर लुकाशेन्कोले वाग्नर समूहका प्रमुख येवगेनी प्रिगोजिन अहिले पनि रूसमै रहेको दाबी गरेका छन् ।

बेलारूसमा कुनै पनि लडाकू समूहले आफ्नो विद्रोह अन्त्यका लागि सम्झौता नगरिएको उनको भनाइ छ ।

बेलारूसका राष्ट्रपति लुकाशेन्कोले भने, ‘जहाँसम्म प्रिगोजिनको कुरा छ, उहाँ सेन्ट पिटर्सबर्गमा हुनुहुन्छ । उहाँ बेलारूसमा हुनुहुन्न ।”

मिन्स्कस्थित प्रेसिडेन्ट बिल्डिङ अफ इन्डिपेन्डेन्समा साढे तीन घण्टा लामो गोलमेच वार्तापछि बेलारूसलगायत अन्तर्राष्ट्रिय पत्रकारसँग कुरा गर्दै उनले प्रिगोजिन स्वतन्त्र व्यक्ति भएको भन्ने कुरा आफूलाई निश्चित रूपमा थाहा भएको बताए । ‘मैले हिजो उहाँसँग फोनमा कुरा गरेको थिएँ’ उनले भने ।

क्रेमलिनले असफल विद्रोहमा भाग लिएकाहरूलाई बेलारूस जान प्रस्ताव गरे पनि वाग्नरका सदस्यहरूले बेलारूसमा शिविर स्थापना नगरेको उनको दाबी थियो । ‘अहिले उनीहरूको स्थानान्तरण र व्यवस्थापनको प्रक्रिया तय भएको छैन’ उनले भने, ‘यो निर्णय उहाँको होइन, मस्कोको हो ।”

प्रिगोजिनले २३ जुनमा रूसको सैन्य नेतृत्वविरुद्ध विद्रोह सुरु गरेको घोषणा गरेको विद्रोहसँगै रूसी राष्ट्रपति भ्लादिमिर पुटिनको नेतृत्वलाई सबैभन्दा ठूलो चुनौती रहेको उनले बताए ।