सामग्री खोज्नुहोस्

टाेकियाे । जापानको राजधानी टोकियोको सिम्बासी नजिकै सोमबार दिउँसो विस्फोट भएको छ ।

स्थानीय समयअनुसार दिउँसो ३ः१५ बजे भएको विस्फोटमा परेर दुई जना पैदल यात्री र दुई जना रेष्टुरेन्टका कर्मचारी घाइते भएका छन् ।

स्थानीय प्रहरी विभागका अनुसार जेआर सिम्बासी स्टेसनबाट करिब ३०० मिटरको दूरीमा रहेको आठ तले भवनमा विस्फोटपछि आगलागी भएको थियो । विस्फोटमा चार जना सामान्य घाइते भएका टोकियो नगर प्रहरी विभागले जनाएको छ ।

विस्फोट हुँदा घटनास्थलबाट निकै टाढासम्म विस्फोटको आवाज सुनिएको र त्यसपछि भवनको दोस्रो तल्लाको एउटा कोठाबाट धेरै टुक्राहरू उडिरहेको देखिएको थियो। आगो तीव्र गतिमा फैलनुअघि ग्यासको हल्का गन्धसँगै कोठामा धुवाँको मुस्लो देखिएको स्थानीयले बताएका जापान टाइम्सले लेखेको छ ।

घटनामा घाइते भएका व्यक्तिहरूको कपाल र लुगाहरू आंशिक रूपमा जलेका छन् ।

अग्नि नियन्त्रक विभागका अनुसार भवनको दोस्रो र तेस्रो तल्ला पूर्णरूपमा जलेको छ भने आगो निभाउन करिब ३१ वटा दमकल पठाइएको छ ।

घटनास्थल टोकियोको प्रमुख इन्टरचेन्ज रेलवे स्टेशनहरू मध्ये एक र गिन्जा किनमेल क्षेत्रबाट केवल १० मिनेटको पैदल दूरीमा धेरै कार्यालय, रेस्टुरेन्ट र आवासीय क्षेत्र रहेको शिम्बाशी स्टेशनको ३०० मीटर पश्चिममा पर्छ । विस्फोटको कारणबारे अनुसन्धान भइरहेको प्रहरीले जनाएको छ ।