सामग्री खोज्नुहोस्

एजेन्सी । रुसी राष्ट्रपति भ्लादिमिर पुटिनले देशवासीका नाममा सम्बोधन गरेका छन् । वाग्नर समूह विद्रोहको धम्कीबाट पछि हटेपछि उनले पहिलोपटक देशवासीका नाममा सम्बोधन गरेका हुन् ।

रुसी टेलिभिजनमार्फत गरिएको सम्बोधनमा पुटिनले वाग्नर गुटको विद्रोह र त्यसमा भाग लिने नेताहरूबारे आफ्नो धारणा राखेका छन् ।
विद्रोहको प्रयासमा संलग्न भाडाका लडाकु समूहका नेताहरूलाई कानुनी कठघरामा ल्याउने उनले चेतावनी समेत दिएका छन् ।

गत शनिबारको विद्रोहको लागि वाग्नर गुटका नेताहरूलाई दोष दिँदै पुटिनले उनीहरूले रुसलाई रक्तपातपूर्ण संघर्षमा डुबेको हेर्न चाहेको आरोप लगाए ।

पुटिनले यो विद्रोहको नेतृत्वकर्तालाई कानुनको कठघरामा ल्याएरै छोड्ने बाचा दोहोर्‍याए ।

यद्यपि, पुटिनले सामान्य वाग्नर सैनिकहरूलाई देशभक्तको संज्ञा दिएका छन् । साथै उनीहरूलाई रुसी सेनामा भर्ती हुन, बेलारुस जान वा आफ्नो घर फर्कन अनुमति दिइने घोषणा पनि गरे ।

‘हामीलाई थाहा छ कि वाग्नर समूहका अधिकांश लडाकु र कमाण्डरहरू पनि रुसी देशभक्त हुन् । उनीहरूले युद्धको मैदानमा आफ्नो साहसबाट यो प्रमाणित गरेका छन् । युक्रेनसँगको युद्धमा ठूलो रक्तपातबाट बच्न मेरो निर्देशन थियो । जबकि पश्चिमाहरू र युक्रेनले रुसीहरू नै एक अर्कालाई मारुन् भन्ने चाहेका थिए’ पुटिनले भने ।

२४ घण्टाभन्दा कम समयमै विद्रोह अन्त्य गरेर रक्तपात नगरेकोमा वाग्नर समूहलाई रुसी राष्ट्रपति पुटिनले धन्यवाद दिए ।

विभिन्न समाचार एजेन्सीको सहयोगमा