सामग्री खोज्नुहोस्

काठमाडौं । दुइ महिना अघि सरकार गठन गर्न प्रमुख भूमिका निर्वाह गरेको नेकपा एमालेले सरकारलाइ दिएको समर्थन समेत फिर्ता गर्दै सरकारबाट बाहिरिने निर्णय गरेको छ । आज राजधानी काठमाडौंमा बसेको एमालेको बैठकले सरकारलाई दिएको समर्थन फिर्ता गर्दै वर्तमान सरकारबाट बाहिरिने निर्णय गरेको हो ।

सरकारको नेतृत्व गरिरहेको नेकपा माओबादी केन्द्रले राष्ट्रपतिको निर्वाचनमा कांग्रेस सहितका दलहरु संग गठबन्धन गरेपछि रुष्ट बनेको एमालेले परराष्ट्रमंत्री बिमला राइ पौड्याललाइ जेनेभा जान बाट अन्तिम समयमा रोकेपछि पार्टीको बैठक बोलाएको थियो ।

मन्त्रीपरिषद बाट भएको निर्णय अनुसार परराष्ट्रमन्त्री विमला राई पौड्याल हिजो जेनेभा जाने अन्तिम तयारीमा थिइन् । प्रधानमन्त्री पुष्पकमल दाहाल प्रचण्डले दिउसो परराष्ट्रमन्त्री राइलाइ जेनेभा नजान भनी मुख्य सचिव मार्फत रोक लगाएका थिए ।

यता संसदको चौंथो ठुलो दल राष्ट्रिय स्वतन्त्र पार्टीले भने तत्काललाइ सरकारलाई दिएको र राष्ट्रपतिको निर्वाचनका बिषयमा कुनै निर्णय लिएको छैन । आजको बैठकमा पार्टीको आन्तरिक बिषय बाहेक अरु बिषयमा छलफल नभएको रास्वपाका केन्द्रिय सदस्य दीपक बोहराले जानकारी दिए ।

‘सरकारलाई दिएको समर्थन र राष्ट्रपतिको निर्वाचनका बिषयमा खासै छलफल भएको छैन’ बोहराले क्योदाई न्यूजसंग भने ‘यो बिषयमा हामी पर्ख र हेरकै नीतिमा छौं, समय आउदा साथ निर्णय गर्नेछौ ।’ आजको बैठकमा पार्टीका आन्तरिक बिषयमामात्र छलफल भएको बोहराका भनाइ छ ।