सामग्री खोज्नुहोस्

टोकियो । जापानलाई सबै भन्दा धेरै श्रमिक उपलब्ध गराउने बिदेशी मुलुकमा भियतनाम पहिलो नम्बरमा परेको छ । जापानको श्रम, स्वास्थ्य तथा कल्याण मन्त्रालयले हालै सार्बजनिक गरेको तथ्याङ्क अनुसार १८ लाख २२ हजार ७२५ कुल बिदेशी कामदारहरु मध्ये ४ लाख ६२ हजार ३८४ जना भियतनामी कामदारहरु जापानमा कार्यरत छन् ।

२५.४ प्रतिशत श्रमिक सहित भियतनाम जापानको श्रम बजारमा पहिलो नम्बरमा आउँदा चीन ३ लाख ८५ हजार ८४८ अर्थात् २१.२ प्रतिशत श्रमिक सहित दोश्रो स्थानमा छ ।

२ लाख ६ हजार ५० अर्थात् ११.३ प्रतिशत श्रमिक सहित फिलिपिन तेश्रो नम्बरमा हुँदा १ लाख १८ हजार १९६ अर्थात् ६. ५ प्रतिशत श्रमिक सहित नेपाल चौथो नम्बरमा छ । जापानलाई सबै भन्दा थोरै कामदार उपलब्ध गराउने देशमा पेरु छ । उसका ३१ हजार २६३ अर्थात् १. ७ प्रतिशत नागरिक जापानी श्रम बजारमा श्रम गरिरहेका छन् ।

माथि उल्लेखित तथ्याङ्कमा पार्ट टाइम काम गर्नेहरुको संख्या समेत समाबेस गरिएको श्रम मन्त्रालयले जनाएको छ । भिषा स्टाटसका आधारमा हेर्दा पिआर, जापानी नागरिक संग बिहे गरेका, पिआरवालाका परिवारहरु जापानको श्रम बजारमा सबै भन्दा धेरै संख्यामा छन् । उनीहरुको संख्या ५ लाख ९५ हजार २०७ अर्थात् ३२.७ प्रतिशत रहेको मन्त्रालयको तथ्याङ्कले देखाएको छ ।

वोर्किङ्ग भिषामा ४ लाख ७९ हजार ९४९, बिशिष्ट गतिबिधि (टोकुतेइ खाचुदोउ) ७३ हजार ३६३ (४. ०%), ट्रेनिङ्ग भिषामा ३ लाख ४३ हजार २५४ (१८.८%), स्टाटस बेगरका गतिबिधि (सिखाकु गाइखाचुदोऊ) ३ लाख ३० हजार ९१० (१८.२%) रहेको तथ्याङ्कमा उल्लेख गरिएको छ ।

सिखाकु गाइखाचुदोऊ भनेको सामान्य भाषामा बुझ्दा बिद्यार्थी वा डिपेनडेण्टहरुले पाउने २८ घण्टा काम गर्ने अनुमति भनेर बुझ्दा हुन्छ । यो स्टाटसमा काम गर्ने सबै भन्दा धेरै ३९.६ प्रतिशत नेपाली बिद्यार्थीहरु छन् ।

क्षेत्र अनुसार तथ्याङ्कको विश्लेषण गर्दा टोकियोमा करिब ८० हजारको हाराहारीमा बिदेशीहरुले श्रम गरिरहेको श्रम मन्त्रालयले जनाएको छ । टोकियो नजिक रहेका साइतामा, चिबा, खानागावा संगै आइची, फ़ुकुओका प्रिफेक्चर र ओसाका क्षेत्र बाहेकका अरु प्रिफेक्चरहरुमा बिदेशी श्रमिकहरुको संख्या ५ हजार भन्दा तल छ ।

सबै भन्दा धेरै कुल बिदेशी श्रमिक सख्याको १८.६ प्रतिशतले खरिद बिक्रि संग सम्बन्धित साना कम्पनिहरुमा र १७.७ बिदेशी श्रमिकहरुले उत्पादनशील कम्पनीमा काम गर्ने गरेको तथ्याङ्कमा उल्लेख छ ।

चार्ट: श्रम मन्त्रालयको वेब साइट बाट