सामग्री खोज्नुहोस्

टर्की । टर्कीको भुकम्प प्रभावित क्षेत्रमा रहेका ३३ जना नेपाली मध्ये तीन जना नेपाली संग अझै सम्पर्क हुन नसकेको गैर आवासीय नेपाली संघ (एनआरएनए) राष्ट्रिय समन्यव परिषद टर्कीले जनाएको छ।

‘त्यस क्षेत्रमा रहेका नेपालीहरु मध्ये तीन नेपाली संग अझै सम्पर्क हुन सकेको छैन’ एनआरएनए टर्कीका महासचिव बिनोद पौडेलले क्योदाई न्यूज संग टेलिफोनमा भने ‘केही राहत सामग्री सहित उनीहरुको अवस्थाबारे जानकारी लिन एनआरएनए टर्कीका सचिव जाभेद अन्सारी त्यस तर्फ जानु भएको छ ।’

त्यहाँ रहेका नेपालीको अवस्था बारे जानकारी लिन एनआरएनए टर्कीका सचिव अन्सारी भुकम्प प्रभावित क्षेत्रतर्फ प्रस्थान गरेको पौडेलको भनाइ छ । भूकम्प प्रभावित क्षेत्रमा बिद्यार्थी र घरेलु कामदार सहित ३३ जना नेपाली रहेको एनआरएनए टर्की जानकारी दियो ।

‘त्यस क्षेत्रमा बिद्यार्थी र घरेलु कामदार सहित ३३ जना नेपाली हुनुहुन्छ भन्ने जानकारी हामीलाई आएको छ’ महासचिव पौडेलले भने ‘तीन जना संग अझै सम्पर्क हुन सकेको छैन, सायद बिजुली या इन्टरनेट नभएका कारणले हुन सक्छ ।’

घरायसी कामका लागि त्यहा पुगेका नेपालीहरु सुरक्षित स्थानमा स्थान्तरण भैसकेको र उच्च माध्यमिक तहको अध्ययनका लागि गएका बिद्यार्थीहरु होस्टेलमै रहेको पौडेलले जानकारी दिए । बिद्यार्थीहरुका हकमा भने बिद्यालयले अनुमति नदिंदा सम्म अन्यत्र स्थान्तरण गर्न नमिल्ने भएकाले सम्बन्धित बिद्यालयहरु संग कोर्डिनेसन भैरहेको उनको भनाइ छ ।

गत सोमबार बिहान टर्की र सिरियाको सीमाक्षेत्रमा ७. ८ म्याग्नेच्युट र सांझपख ७.६ म्याग्नेच्युटको भुकम्प गएको थियो । भूकम्पका कारण हाल सम्म टर्की र सिरियामा १६ हजार भन्दा बढीको मृत्यु भएको छ ।