सामग्री खोज्नुहोस्

एजेन्सी । मध्य इराकमा कृषि जग्गाको विवादलाई लिएर भएको आदिवासी झडपमा आठ जनाको मृत्यु भएको छ । साथै अन्य नौ जना घाइते भएका वासित प्रान्तका एक सुरक्षा अधिकारीलाई उद्धृत गर्दै शनिबार एएफपीले जनाएको छ ।

शनिबार खेसान गाउँमा बेदुइन जनजातिका सदस्यहरू बीच कृषि जग्गाको विषयलाई लिएर विवाद शुरू भएको एक जना अधिकारीले नाम नबताउने  सर्तमा पुष्टि गरे ।

अधिकारीले विवादमा संलग्न व्यक्तिहरू मध्येका केही मानिसहरूको मृत्यु तथा घाइते भएको समेत पुष्टि गरेका छन् ।

उक्त क्षेत्रमा स्थिति समाधानका लागि धेरै सङ्ख्यामा सुरक्षा अधिकारीहरू तैनाथ गरिएको भएता पनि झडप भने अझै बन्द नभएको जनाइएको छ ।

इराकमा लामो समयदेखि स्थानीय आदिवासी समुदायका बीचमा वेमेलका कारण पटक-पटक झडप हुने गरेको तथा युद्धले ग्रस्त देशमा सामान्य विषयमा घातक झडपहरू हुने गरेको जनाइएको छ ।