सामग्री खोज्नुहोस्

​एजेन्सी । अमेरिकामा जारी शटडाउनका कारण हवाई सेवा व्यापक रूपमा अवरुद्ध भएको छ ।

सङ्घीय उड्डयन प्रशासन (एफएए)ले हवाई यातायात घटाउने आदेश दिएका कारण शनिबार साँझसम्म अमेरिकी एयरलाइन्सहरूले सप्ताहन्तभर दुई हजार ५०० भन्दा बढी उडान रद्द गरेका छन् ।

सरकारी बन्द कहिले अन्त्य हुने कुनै सङ्केत नदेखिएपछि देशका प्रमुख विमानस्थलहरूमा यात्रुहरू अलमलमा परेका छन् ।

देशका व्यस्त विमानस्थलहरूमा देखिएको अव्यवस्थाले लामो समयदेखि चलिरहेको सङ्घीय बन्दको असर झन् गहिरो बनाएको छ । यात्रुहरूका गुनासा बढिरहेका छन् ।​

फ्लाइट ट्र्याकर फ्लाइटअवेयरका अनुसार रद्दका साथै लगभग ६ हजार उडानहरू पनि डिले भएका छन् । यो संख्या शुक्रबार डिले भएका ७ हजार उडानहरूभन्दा कम हो।

संघीय उड्डयन प्रशासन (एफएए)ले यसैसाता हवाई ट्राफिक नियन्त्रकहरूले तलब बिना काम गर्ने कारणले ४० व्यस्त विमानस्थलहरूमा हवाई यात्रा क्षमता १० प्रतिशतले घटाउने घोषणा गरेको थियो ।

नियन्त्रकको अभावले उडानहरूलाई उल्लेखनीय रूपमा असर गरेको छ।

हवाई ट्राफिक नियन्त्रकहरूले या त बिरामी बिदा लिइरहेका छन् वा अन्यत्र काम गरिरहेका छन् ।

अमेरिकी संसदको हाउस अफ कंग्रेसमा रिपब्लिकन र डेमोक्र्याटहरू अझै पनि यस मुद्दामा सहमतिमा पुग्न असमर्थ छन् र यस वर्षको अक्टोबर १ मा शुरू भएको सटडाउन जारी छ।