सामग्री खोज्नुहोस्

एजेन्सी । टर्कीको बोड्रम रिसोर्ट नजिकैको एजियन सागरमा डुङ्गा पल्टिँदा कम्तीमा १४ आप्रवासीको मृत्यु भएको स्थानीय गभर्नरको कार्यालयले शुक्रबार जनाएको छ।

‘उक्त दुर्घटनामा १४ जना गैरकानूनी रूपमा आएका आप्रवासीहरूको मृत शरीर फेला परेको छ,’ मुग्ला प्रान्तको गभर्नरको कार्यालयले एक्समा जनाएको छ।

घटनाबारे तटरक्षकलाई शुक्रबार बिहान आपतकालीन सहयोगका लागि जानकारी गराइएको तर सहयोगका लागि टोली पुग्दा धेरै जनाले ज्यान गुमाइसकेको बताइएको छ।

उद्धारकर्मीले दुई जीवित व्यक्तिलाई उद्धार गरेका छन् । उनीहरूमध्ये एकले भने, ‘डुङ्गामा १८ जना सवार थिए, डुङ्गामा पानी पस्न थालेको १० मिनेटपछि डुङ्गा डुबेको घटनामा पौडी खेली जीवन जोगाउन सफल भएका हौं ।’ 

उनी पौडी खेल्दै सेलेबी टापुमा उत्रन सफल भएका थिए।

बाँचेका मध्ये एक जना अफगानी नागरिक रहेको गभर्नरको कार्यालयले जनाएको छ भने जीवित अर्का एक र मृतक सबैको राष्ट्रियता अहिलेसम्म खुलाइएको छैन ।

हेलिकप्टर र एक विशेषज्ञ गोताखोर टोलीले बाँकी दुई आप्रवासीहरूको खोजी गरिरहेको छ ।