सामग्री खोज्नुहोस्

काठमाडौं । आईसीसी टी–२० विश्वकप एसिया एन्ड इस्ट एसिया प्यासिफिक छनोटको सुपर सिक्सको आफ्नो पहिलो खेलमा नेपालले संयुक्त अरब इमिरेट्स (यूएई)लाई १ रनले पराजित गरेको छ ।​ 

ओमानको अल अमेरतस्थित ओमान क्रिकेट एकेडेमीतर्फ–१ मा आइतबार भएको खेलमा नेपालले यूएईलाई एक रनले पराजित गर्दै विजयी भएको हो ।

नेपालले जीतका लागि दिएको १४१ रनको लक्ष्य पछ्याएको यूएईले निर्धारित २० ओभरमा ९ विकेट गुमाएर १३९ रन मात्रै बनायो ।

यूएईका लागि अलिशान सराफूले अर्धशतकीय पारि खेले पनि जीतका लागि पर्याप्त हुन सकेन । उनले तीन चौका र पाँच छक्काको मद्दतमा ५८ रन बनाए ।

यसैगरी ध्रुव पराशरले १८ बलमा ३२ रन बनाए भने जोनाथन फिगीले १९ रन बनाए ।

नेपालका लागि दीपेन्द्रसिंह ऐरीले तीन विकेट लिँदा गुल्सन झा, सन्दीप लामिछाने र सोमपाल कामीले समान एक/एक विकेट लिए ।

त्यसअघि टस जितेर पहिले ब्याटिङ गरेको नेपालले निर्धारित २० ओभरमा छ विकेट गुमाएर १४० रनको योगफल बनाएको थियो ।

नेपालका लागि आसिफ शेखले ४७ बलमा ५१ रन बनाए । यस्तै, कुशल भुर्तेलले २८ रन तथा कप्तान रोहित पौडेलले २० र गुल्सन झाले १४ रन बनाए ।

यूएईका लागि जुनेद सिद्दिकी, मुहम्मद रोहिद, जाहिद अली, ध्रुव पराशर, हर्षित कौशिक र हेदर अलीले समान एक/एक विकेट लिए ।

नेपालले दोस्रो खेल सोमबार कतारसँग खेल्नेछ । उक्त खेल नेपाली समयअनुसार राति ८ः४५ बजे हुनेछ ।