सामग्री खोज्नुहोस्

एजेन्सी । शनिबार राति पाकिस्तान र अफगानिस्तानबीचको सीमा क्षेत्रमा तीव्र गोलीबारी भएको छ।

यसअघि यसै साताको शुरूमा पाकिस्तानले काबुलमा हवाई आक्रमण गरेको घटनापछि अफगान तालिबान लडाकुहरूले पाकिस्तानी चौकीहरूमा हमला गरेको दुवै देशका सुरक्षा अधिकारीहरूले पुष्टि गरेका छन्।

पाकिस्तानी सुरक्षा अधिकारीहरूका अनुसार अफगानिस्तानतर्फबाट भएको ‘उत्तेजनाविहीन आक्रमण’ को जवाफमा पाकिस्तानी सेनाले ‘पूर्ण बलका साथ’ प्रत्याक्रमण गरेको हो। उनीहरूले सीमाको ६ भन्दा बढी स्थानमा गोलीबारी भएको बताएका छन्।

तालिबान फौजले तीनवटा पाकिस्तानी चौकी कब्जा गरेको दाबी गरेको छ भने पाकिस्तानी अधिकारीहरूले आफैंले अफगान सेनाका केही पोस्टहरू ध्वस्त पारेको बताएका छन्।

पाकिस्तानी अधिकारीहरूले सार्वजनिक गरेको भिडियो फुटेजमा अफगानिस्तानतर्फ बन्दुक र तोपको भीषण फायरिङ देखिएको छ, जसले रातको आकाश उज्यालो बनाएको थियो।

अफगानिस्तानको रक्षा मन्त्रालयका प्रवक्ता इनायतुल्लाह खोराज्मीका अनुसार यो कारबाही पाकिस्तानले अफगान हवाई क्षेत्र उल्लङ्घन गरेको प्रतिकार स्वरूप गरिएको सीएनएनले जनाएको छ ।