सामग्री खोज्नुहोस्

एजेन्सी । इन्डोनेसियामा गत हप्ताको विद्यालय दुर्घटनाका पीडितहरूको खोजी मङ्गलबार समाप्त भएको र मृतकको सङ्ख्या ६७ पुगेको एक अधिकारीले पुष्टि गरेका छन् ।

इन्डोनेसियाको जाभा टापुमा रहेको बहुतले ईस्लामिक बोर्डिङ स्कूलको एक भाग २९ सेप्टेम्बरमा दिउँसो प्रार्थनाका लागि १७० भन्दा बढी विद्यार्थीहरू भेला हुँदा ढलेको थियो ।

‘नवौं दिनमा प्रवेश गर्दै हामीले पीडितहरूका लागि खोजी र उद्धार अभियान सम्पन्न गरेका छौं,’ राष्ट्रिय खोजी र उद्धार एजेन्सी (बसरनास)का प्रमुख मोहम्मद सियाफीले पत्रकार सम्मेलनमा भने ।

एजेन्सीका अपरेसन निर्देशक युधि ब्रामान्ट्योले भने, ‘उद्धार गरिएका पीडितहरूको कुल सङ्ख्या १७१ छ । यसमा ६७ जनाको मृत्यु भएको छ, आठ शरीरका अङ्गहरूसहित र १०४ जना बाँचेका छन् । उद्धारकर्ताहरूले दुर्घटनास्थलमा रहेका सबै भग्नावशेष सफा गरेका छन् र थप शव फेला पर्ने सम्भावना कम छ ।’

राष्ट्रिय विपद् एजेन्सी (बीएनपीबी)का उप प्रमुख बुदी इरावानले भने, ‘त्यहाँ अझै शवहरू रहेको सम्भावना धेरै कम छ ।’

अहिलेसम्म १७ शवको मात्र पहिचान भएको छ ।