सामग्री खोज्नुहोस्

राज्यले बन्दुक बोकेरै आयो, हामीले कलम
टाउकोमा गोली ताकेरै हान्यो के लाउथ्यो मलम।

माथिका हरफहरु हिजोमा मात्रै सार्बजनिक भएको बिनम्र खत्रीको ‘हामी जेन्जी पुस्ता’ भन्ने गीति संग्रहबाट लिइएको हो। चर्चित एवं लोकप्रिय गायक बिष्णु खत्रीको शब्द संगीतमा बिनम्रले गाएको उक्त गीत उनको सांगीतिक करियरको पहिलो एकल गीत हो।

हालै नेपालमा जेन्जी पुस्ताले गरेको प्रदर्शनका क्रममा मृत्यु भएका युवाहरुका बारेमा तयार पारिएको गीत बिनम्र खत्रीले बिहीबार बिष्णु खत्री नामक युट्युब च्यानल बाट सार्बजनिक गरेका हुन्।

बिष्णु खत्रीका गीतमा अभिनय र भिडियो निर्देशक समेत भएर काम गरिसकेका बिनम्र खत्रीले पहिलो पटक आफ्नै स्वरमा गीत सार्बजनिक गरेका हुन्। ‘हुन यसअघि निस्केको पिर चिन्ताले भन्ने गीतमा पनि स्वर दिएको थिएँ’ क्योदाई न्यूज संगको कुराकानीमा बिनम्रले भने ‘त्यसमा मेरो एक/दुइ टुक्का मात्रै स्वर थियो, मेरो एकल स्वरमा निक्लिएको यो नै पहिलो गीत हो।’

देशमा ब्याप्त भ्रष्ट्राचारको नियन्त्रण हुनपर्ने माग राख्दै जेन्जी पुस्ताले केही दिन अघि देशभर प्रदर्शन गर्दा ७२ जनाको मृत्यु भएको थियो। बिनम्रले त्यसै बिषयलाई समेटेर ‘हामी जेन्जी पुस्ता’ नामक आफ्नो पहिलो एल्बम बजारमा ल्याएका हुन्।

आफु पनि जेन्जी पुस्तामा पर्ने भएकाले यो पुस्ताले राष्ट्रका लागि दिएको बलिदानीको कदर गर्दै उनीहरुकै आवाज समेटेर गीत सार्बजनिक गरेको बिनम्रको भनाइ छ। उनी भरिया दाइ, किसानी दाइ, अन्तर जातीय बिवाह, पछुतो, कि सास चाहियो कि लास चाहियो जस्ता चर्तित गीतका सर्जक तथा गायक बिष्णु खत्रीका छोरा हुन्।