सामग्री खोज्नुहोस्

एजेन्सी । पोर्चुगलले सन् २०२५ मा ९४ वर्षयताकै सबैभन्दा बढी गर्मीयाम अनुभव गरेको पोर्चुगल समुद्र तथा मौसम विज्ञान संस्थानले जनाएको छ ।

यो वर्ष देशको औसत हावाको तापक्रम २३.५१ डिग्री सेल्सियस पुगेको छ, जुन सन् १९९१ देखि २०२० सम्मको औसतभन्दा १.५५ डिग्री बढी हो ।

अधिकतम तापक्रमको औसत ३०.७८ डिग्री सेल्सियस मापन गरिएको छ, जुन पछिल्ला ९ दशकभन्दा बढी समययताकै उच्च हो ।

देशभर ३३ ठाउँमा अहिलेसम्मकै सबैभन्दा उच्च तापक्रम रेकर्ड भएको छ भने १० ठाउँमा न्यून तापक्रमका नयाँ कीर्तिमान बनेका छन् । जुन २९ तारिखमा मोरा नामक सहरमा ४६.६ डिग्री तापक्रम मापन भएको थियो, जुन मुख्यभूमिको लागि जुन महिनामै पहिलोपटक भएको हो ।

साथै, यो गर्मीयाम सन् १९३१ यताकै सबैभन्दा सुक्खा पनि भएको छ । देशभर कुल वर्षा मात्रा मात्र १०.९ मिलिमिटर मापन भएको छ, जुन औसतको २४ प्रतिशत मात्रै हो ।

मौसम विभागले यो वर्षको गर्मीयामलाई ‘अत्यधिक गर्मी र अत्यधिक सुक्खा’ भनेर वर्णन गर्दै, तापक्रमको अत्यधिक वृद्धि र न्यून वर्षाका कारण यो गर्मीयाम पोर्चुगलको मौसम इतिहासमा विशेष रह्यो भनेको छ ।