सामग्री खोज्नुहोस्

टोकियो । अमेरिकी राष्ट्रपति डोनाल्ड ट्रम्प प्रशासनको शुल्क अभियान तीव्र बन्दै गएसँगै जापानी व्यवसायहरूले पूँजीगत लगानी घटाएका छन् ।

जापानको अर्थ मन्त्रालयले सोमबार सार्वजनिक गरेको तथ्याङ्कअनुसार, सफ्टवेयर बाहेकका वस्तुहरूमा पूँजीगत खर्च लगातार पाँचौं त्रैमाससम्म बढे पनि यस वर्ष जुनसम्मको तीन महिनामा वृद्धि दर अघिल्लो अवधिसँग तुलना गर्दा ०.२ प्रतिशतमा मात्र सीमित रह्यो ।

यसअघिको अनुमानअनुसार, जापानको कुल गार्हस्थ्य उत्पादन (जीडीपी)मा कर्पोरेट लगानी १.३ प्रतिशतले बढेको देखाइएको थियो । नयाँ तथ्याङ्कलाई समेटेर यही सेप्टेम्बर ८ मा सार्वजनिक हुने संशोधित जीडीपी प्रतिवेदनमा समावेश गरिने जापान टाइम्सले जनाएको छ ।

गत वर्षको सोही अवधिसँग तुलना गर्दा भने परिणाम केही बलियो देखियो। सफ्टवेयरसहितको लगानी ७.६ प्रतिशतले बढ्यो, जुन ६.१ प्रतिशत वृद्धिको मध्य अनुमानभन्दा बढी हो। त्यस्तै नाफा वार्षिक आधारमा ०.२ प्रतिशतले बढ्दा बिक्री ०.८ प्रतिशतले वृद्धिमा पुगेको छ।