सामग्री खोज्नुहोस्

एजेन्सी । यमनको हुथी विद्रोही समूहले आफ्ना स्व–घोषित प्रधानमन्त्री अहमद घालेब नासेर अल–रहावी यसै हप्ताको इजरायली हवाई आक्रमणमा मारिएको पुष्टि गरेको छ।

इरान समर्थित यस समूहले भने अनुसार, गत बिहीबार इजरायली सेना (आईडीएफ)ले यमनको राजधानी सानालाई लक्ष्य बनाएर गरेको हवाई आक्रमणमा उनका साथै अन्य वरिष्ठ अधिकारीहरू पनि मारिएका बीबीसीले लेखेको छ ।​

आईडीएफले पनि रहावीसहितका उच्चस्तरीय हुथी अधिकारीहरूलाई ‘उन्मूलन गरिएको’ भन्दै साना क्षेत्रमै भएको भेला लक्षित गरी आक्रमण गरिएको जनाएको छ।

हुथीहरूले २०१४ देखि अन्तर्राष्ट्रियस्तरमा मान्यता प्राप्त सरकारलाई साना बाट हटाएर उत्तर–पश्चिमी क्षेत्रको ठूलो भाग नियन्त्रणमा लिएपछि शुरू भएको गृहयुद्ध अझै जारी छ।

हुथीहरूको दाबी अनुसार, रहावीका साथै केही मन्त्रीहरू पनि मारिएका छन्, तर अन्यको नाम भने खुलाइएको छैन ।

साउदी अरबको समाचार साइट अल–हदथका अनुसार हुथीहरूको परराष्ट्रमन्त्री, न्यायमन्त्री, युवा तथा खेलकुद मन्त्री, सामाजिक मामिला तथा श्रम मन्त्री पनि मारिएका बताइएको छ।