सामग्री खोज्नुहोस्

टोकियो । जापानको अर्थतन्त्रले सन् २०२५ को दोस्रो त्रैमासिक अर्थात् अप्रिलदेखि जुन महिनासम्मको अवधिमा वार्षिक १ प्रतिशतले आर्थिक विस्तार गरेको छ ।

जापानको क्याबिनेट कार्यालयले शुक्रबार सार्वजनिक गरेको प्रारम्भिक तथ्याङ्कअनुसार यो लगातार पाँचौं पटक त्रैमासिक रूपमा आर्थिक वृद्धि देखिएको हो ।

जनवरी–मार्च अवधिको प्रारम्भिक तथ्याङ्कमा ०.२ प्रतिशतको गिरावट देखाइएको थियो, तर त्यसलाई संशोधन गरी ०.६ प्रतिशतको वृद्धि गरिएको छ ।

महँगी समायोजनपछि, अप्रिल–जुन त्रैमासिकमा जापानको वास्तविक सकल घरेलु उत्पादन (जीडीपी) अघिल्लो त्रैमासिकको तुलनामा ०.३ प्रतिशतले बढेको कार्यालयको प्रारम्भिक प्रतिवेदनमा जनाइएको छ ।

यो जीडीपी वृद्धिको मुख्य कारण निर्यातमा देखिएको दृढता हो । निर्यात अघिल्लो त्रैमासिकको तुलनामा २.० प्रतिशतले बढ्दा आयात ०.६ प्रतिशतले वृद्धि भएको थियो ।

निर्यात र आयातबीचको अन्तरले त्रैमासिक वृद्धिमा ०.३ प्रतिशत विन्दुको योगदान दिएको छ, जुन सबैभन्दा ठूलो योगदान हो । त्यसपछि निजी लगानी दोस्रो ठूलो योगदानकर्ता रहेको छ ।

घरेलु मागको प्रमुख सूचक मानिने पुँजी लगानी (क्यापिटल इन्भेस्टमेन्ट) पहिलो त्रैमासिकको तुलनामा १.३ प्रतिशतले बढेको छ, जुन पाँचौं पटक लगातार वृद्धिमा रहेको देखिन्छ ।

अन्य प्रमुख घटकहरूमध्ये, कुल आर्थिक उत्पादनको आधाभन्दा बढी हिस्सा ओगट्ने निजी खपत (प्राइभेट कन्जम्प्सन) ०.२ प्रतिशतले मात्र वृद्धि भएको छ ।