सामग्री खोज्नुहोस्

एजेन्सी । इजरायलमा २०२३ देखि अज्ञात अवस्थामा रहेका विपिन जोशीको खोजी तथा रिहाइका लागि उनकी आमा पद्मा जोशी र १७ वर्षीया बहिनी पुष्पा जोशी इजरायल पुगेका छन् ।

तेल अविभ नजिकैको बेन ग्युरियन विमानस्थलबाट बाहिरिँदा पत्रकारहरूले उनीहरूसँग प्रतिक्रिया लिएका थिए ।

भावुक हुँदै आमाले भनिन्, ‘मेरो छोरालाई बचाउनुहोस् । हमास, उनलाई घर फर्काउनुहोस् । उनलाई फर्काइदिनुहोस्, हमास, कृपया।’

पुष्पाले भने इजरायली जनतासँगै सरकारलाई पनि सहयोगका लागि धन्यवाद दिँदै भनिन्, ‘उहाँ पढाइका क्रममा यहाँ आउनु भएको थियो । युद्धसँग उहाँको कुनै सम्बन्ध छैन । हामीलाई उहाँको मात्र चाहना छ, तुरुन्त सुरक्षित फर्किनुहोस्,’ उनले थपिन्, ‘यो हाम्रो लागि धेरै भयो। लगभग दुई वर्ष भयो। उहाँ त्यहाँ के गर्दै हुनुहुन्छ, खानपान र औषधि पाइरहनु भएको छ कि छैन, हामीले सोचेको मात्र छौं।’

विमानस्थलमै विपिनसँगै नेपालमा पढेका र इजरायल आएर हमासको आक्रमणमा घाइते भएका तर अपहरणबाट जोगिएका उनका चार साथीहरू पनि भेट गर्न पुगेका थिए। विपिन पढ्ने कृषि कलेजका अध्यक्षले पनि परिवारलाई स्वागत गरे।

एक साथीले विपिनबारे भने, ‘उहाँ धेरै जिज्ञासु र सकारात्मक व्यक्तित्व हुनुहुन्थ्यो। नयाँ कुरा गर्न सधैं उत्सुक हुनुहुन्थ्यो। संगीत, गिटार र फुटबलमा उहाँलाई रुचि थियो।’

७ अक्टोबरको आक्रमणमा विपिन अन्य नेपाली विद्यार्थी र थाई कामदारहरूसँग बाहिरी आश्रयस्थलमा लुकिरहेका बेला उनीमाथि ग्रिनेड प्रहार भएको थियो। प्रत्यक्षदर्शीका अनुसार उनले एउटा ग्रिनेड समातेर बाहिर फ्याँकेका थिए।

इजरायलको बसाइका क्रममा विपिनको परिवारले अलुमिम भ्रमण गर्ने, उनका साथीहरूसँग भेट्ने र सरकारी अधिकारीहरूसँग उनको अवस्थाबारे जानकारी लिने योजना छ। उनीहरू इजरायलका राष्ट्रपति आइज्याक हर्जोग, विदेश मन्त्री गिडोन सार र केनेसट सभामुख आमिर ओहानासँग भेट्ने पनि तय भएको टाइम्स अफ इजरायलले जनाएको छ ।

प्रधानमन्त्री कार्यालयअन्तर्गतको बन्धक, बेपत्ता र स्वदेश फर्काउने निर्देशकालयका अनुसार सन् २०२३ नोभेम्बरयता विपिनको कुनै समाचार आएको छैन र उनको जीवनबारे गहिरो चिन्ता छ।