सामग्री खोज्नुहोस्

टोकियो । जापनको शिगा प्रान्तीय प्रहरी प्रमुख हिसआकी इकेउचिले बिहीबार एक पूर्व सहायक नर्स मिका निशियामासँग माफी मागेका छन् । निशियामा एक बिरामीको हत्या आरोपमा कैद भुक्तान गरिसकेपछि पुनः मुद्दामा निर्दोष प्रमाणित भएकी निशियामासँग उनले माफी मागेका हुन् ।

स्थानीय अदालतले शिगा प्रान्तीय प्रहरीको अनुसन्धानलाई गैरकानूनी ठहर गरेपछि प्रहरी प्रमुख इकेउचिले निशियामा र उनका आमाबुवासँग शिगा प्रान्तीय कार्यालयमा झुकेर क्षमा मागेका हुन् ।

‘पक्राउ परेदेखि हालसम्मको २१ वर्षभन्दा बढीको अवर्णनीय पीडा र तनावका लागि हामी गहिरो रूपमा माफी चाहन्छौं,’ इकेउचिले भने ।

निशियामालाई जुलाई २००४ मा शिगाको एक अस्पतालमा २००३ मा एक पुरुष बिरामीको हत्या गरेको आरोपमा पक्राउ गरिएको थियो ।

प्रहरीले अनुसन्धानका क्रममा निशियामाबाट स्वीकारोक्ति लिएको थियो, तर उनले अदालतमा निर्दोष भएको जिकिर गर्दै आएकी थिइन् । उनलाई १२ वर्ष कैद सजाय सुनाइएको थियो।

उनले सजाय पूरा गरेपछि उच्च अदालतले पुनः मुद्दाको आदेश दिएको थियो। अदालतले निशियामाको बयानप्रति शंका जनाउँदै पुनः मुद्दालाई स्वीकृति दिएको थियो। अप्रिल २०२० मा उनी निर्दोष ठहरिएकी थिइन्।

यस वर्ष जुलाईमा ओत्सु जिल्ला अदालतले प्रहरी अनुसन्धान गैरकानुनी भएको ठहर गर्दै शिगा प्रान्तीय सरकारलाई निशियामालाई करीब ३१ मिलियन येन (झण्डै २.८ करोड नेपाली रुपैयाँ) क्षतिपूर्ति दिन आदेश दिएको छ। उक्त आदेश अन्तिम भएको जापान टाइम्सले जनाएको छ ।

तर अदालतले केन्द्रीय सरकारविरुद्ध निशियामाले मागेको क्षतिपूर्ति भने अस्वीकार गरेको छ। अभियोजन पक्षको मुद्दा दायर गर्ने निर्णयलाई ‘केही हदसम्म उचित’ ठहर गर्दै अदालतले निशियामाको त्यो माग खारेज गरेको हो । निशियामाले उक्त निर्णयविरुद्ध पुनरावेदन गरेकी छिन् ।