सामग्री खोज्नुहोस्

एजेन्सी । अस्ट्रेलियाले १६ वर्षमुनिका बालबालिकाको सुरक्षाका लागि युट्युबमाथि प्रतिबन्ध लगाउने भएको छ।

प्रधानमन्त्री एन्टोनी अल्बानेज र सञ्चारमन्त्री अनिका वेल्सले बुधबार क्यानबेरामा आयोजित पत्रकार सम्मेलनमा प्रतिबन्ध आगामी डिसेम्बर १० देखि लागू हुने जानकारी दिए ।

यसअघि शैक्षिक र स्वास्थ्य सामग्रीका कारण युट्युबलाई छुट दिइएको थियो। तर, ई सेफ्टी कमिसनर जुली इनम्यान ग्रान्टले युट्युबमार्फत बालबालिकामा हानिकारक सामग्रीको पहुँच हुने जोखिम औंल्याउँदै प्रतिबन्धको सिफारिस गरेका थिए ।

प्रधानमन्त्री अल्बानेजले यस्ता प्लेटफर्महरूलाई नियन्त्रण गर्न जरुरी भएको बताउँदै बालबालिकाको सुरक्षाका लागि यो पहिलो तर महत्त्वपूर्ण कदम भएको उल्लेख गरे ।

सञ्चारमन्त्री वेल्सले पनि अभिभावकको हितलाई ध्यानमा राखेर निर्णय गरिएको बताउँदै कानूनी दबाबलाई सरकारले ध्यान नदिने स्पष्ट पारे ।​

युट्युबका प्रतिनिधिले भने यो निर्णयप्रति चिन्ता व्यक्त गरेका छन् र आगामी कदमबारे गुगलमार्फत छलफल भइरहेको जनाएका छन् । सरकारले उमेर प्रमाणीकरण प्रविधिको परीक्षणपछि प्रतिबन्ध कार्यान्वयनको प्रक्रिया थप स्पष्ट गर्ने जनाएको छ।