सामग्री खोज्नुहोस्

एजेन्सी । अमेरिकी राष्ट्रपति डोनाल्ड ट्रम्पले थाईल्यान्ड र कम्बोडियाका नेताहरूसँग टेलिफोन वार्ता गर्दै तत्काल युद्धविराम गर्न आग्रह गरेपछि दुवै मुलुकले धन्यवाद दिएका छन् । यद्यपि, सीमा क्षेत्रमा गोलाबारी भने यथावत् रहेको अन्तर्राष्ट्रिय सञ्चारमाध्यमहरूले जनाएका छन्।

ट्रम्पले शनिबार आफ्नो स्कटल्याण्ड भ्रमणको शुरूवातमा सामाजिक सञ्जालमा लेख्दै, ‘दुवै देशले तुरुन्त भेटवार्ता गरेर युद्धविरामको दिशामा अगाडि बढ्ने सहमति जनाएका छन्’, बताएका थिए । उनले यस कदमलाई ‘शान्तिको प्रारम्भ’ भन्दै उल्लेख गरेका थिए।

कम्बोडियाले ट्रम्पको युद्धविराम प्रस्ताव स्वीकार गरिसकेको छ, भने थाईल्यान्डले द्विपक्षीय संवादको आवश्यकता रहेको जोड दिएको छ।

तर ट्रम्पको आग्रहपछि पनि सीमा क्षेत्रमा रातभर गोला वर्षा जारी रहेको बीबीसीले लेखेको छ ।

थाईल्यान्ड र कम्बोडियाका प्रधानमन्त्रीहरूबाट ट्रम्पको पहलप्रति सकारात्मक प्रतिक्रिया आए पनि दुबै पक्षको आधिकारिक नीति र दृष्टिकोणमा खास परिवर्तन भने देखिएको छैन।

सूत्रहरूका अनुसार, कम्बोडियाले पहिले नै युद्धविरामको प्रस्ताव गरिसकेको थियो। यद्यपि, त्यसको सैन्य शक्ति तुलनात्मक रूपमा कमजोर रहेकाले थाईल्यान्डको तोप आक्रमण र हवाई आक्रमणबाट भौगोलिक क्षेत्र र सैन्य उपकरण गुमाइरहेको बताइएको छ।

क्षेत्रीय सुरक्षामा तनाव कायमै रहेको र स्थायी समाधानका लागि प्रभावकारी कूटनीतिक संवाद आवश्यक रहेको विज्ञहरू बताउँछन्।