सामग्री खोज्नुहोस्

टोकियो । जापानको ओसाकामा विश्वमै प्रतिष्ठित मानिने ओसाका कान्साई एक्स्पो (विश्वप्रदर्शनी)सुरु भएको ३ महिनापछि नेपालले मण्डप तयार गरेको छ । निर्माण कम्पनीलाई निर्माण लागत तिर्न नसक्दा एक्स्पो सुरु भएको तीन महिना पछि मात्र नेपाल मण्डप सञ्चालनमा आएको हो ।

गत अप्रिल १३ तारिखबाट सुरु भएको एक्स्पो अक्टोबर १३ तारिखसम्म चल्ने छ । एक्स्पोमा नेपाल मण्डप निर्माणका लागि नेपाल सरकारले उद्योग वाणिज्य तथा आफूर्ति मन्त्रालय अन्र्तगत व्यापार तथा निकासी प्रबद्र्धन केन्द्र मार्फत् टेन्डर आवह्न गरेको थियो ।

टेन्डर बिद म्यानेजमेन्ट प्राइभेट लिमिटेड, ललित मनडिस्प आर्ट एण्ड आर्किटिच प्राइभेट लिमिटेडले कम्पनीले हाता पारेको थियो । टेन्डर हात पार्ने कम्पनीले जापानको सानक्यो कन्स्ट्रक्शन कम्पनीलाई ‘नेपाल पोभेलियन’ निर्माणको जिम्मा दिएको थियो । सानक्यो कन्स्ट्रक्शन कम्पनीलाई लागत रकम तिर्न ढिला भएको कारण नेपालले तीन महिनापछि मात्र नेपाल मण्डप सञ्चालनमा ल्याउन सकेको हो ।

जुलाई २८ मा ‘नेपाल डे’ मनाइने
जापान सरकारसँगको सहकार्यमा एक्स्पोमा जुलाई २८ तारिख ‘नेपाल डे’ मनाउने निर्णय भएको जापानका लागि नेपाली राजदूत डा. दुर्गाबहादुर सुवेदीले जानकारी दिए । राजदूत सुवेदीले ‘नेपाल डे’ को दिन सबै नेपालीलाई ओसाका एक्स्पोमा सहभागिता जनाउन आग्रहसमेत गरेका छन् ।

समयमा नै रकम भुक्तानी गर्न नसक्दा त्यसको नकारात्मक चर्चा जापानमा सञ्चारमाध्यमदेखि सामाजिक सञ्जालसम्म भएको थियोे । सोही विषयलाई प्रष्ट पार्दै राजदूत डा. दुर्गाबहादुर सुवेदीले भने, ‘लगभग पाँच वर्ष अघि नेपाल सरकारले एक्स्पोमा नेपाल मण्डपको जिम्मा नीजि कम्पनीलाई दिएको थियो ।

एक्स्पो सुरु भएको दुई सातासम्म नेपालसहित भारत लगायत अन्य देशको पनि मण्डप तयार तयार पार्न सकेका थिएन । अन्य देशको केही प्राविधिक समस्या थियो भने नेपालको आर्थिक समस्या थियो । जसकारण नेपालमा मण्डप सञ्चालनमा ढिलाइ भएको हो ।’

फ्रान्समा मुख्य कार्यालय रहेको ब्युरो अफ इन्टरनेसनल एक्सपोजिसनले सञ्चालन गरेको एक विश्व प्रदर्शनी हो । नेपालसहित विश्वका १८४ देश यसको सदस्य रहेका छन् । हरेक पाँच वर्षमा प्रदर्शन गर्ने देश र स्थलको छनोट गरिन्छ ।

एक्स्पोमा संसारभरका करोडौँ दर्शकले अवलोकन गर्छन् । ‘एक्स्पो हरेक देशले आफ्नो देशको उत्पादन र टेक्नोलोजी सम्बन्धि गरेको आविष्कार प्रदर्शन र बजारीकरण गर्ने थलो हो ।

विश्व बजारको मागलाई ध्यान दिने
एक्स्पोलाई नेपाली उत्पादनको प्रदर्शनी, व्यापार साथै लगानी भित्र्याउने थलोको रुपमा हेरिएको छ । एक्स्पोमा ह्यान्डीक्राफट आइटम र हिमाली भेगमा पाइने रैथाने बालि, नेपाली चिया तथा कफीको प्रदर्शनी र अर्डर लिने काम गरिने व्यापार तथा निकासी प्रबद्र्धन केन्द्रका उपनिर्देशक सिद्धिचरण दाहालले बताए ।

एक्स्पोमा १५८ राष्ट्रको सहभागिता रहेको छ । जसकारण एक्स्पोलाई नेपाली उत्पादन बजारीकरण गर्ने महत्वपूर्ण थलोको रुपमा हेरिएको दाहाल बताउँछन् ।