Kyodai News

एजेन्सी । पूर्वी इराकी शहर कुटको शपिङ मलमा आगलागी हुँदा करिब ६१ जनाको मृत्यु भएको छ । ४५ सुरक्षित उद्धार गरिएको छ भने ११ जना अझै बेपत्ता रहेका छन् ।

‘एउटा प्रमुख शपिङ सेन्टरमा भएको आगलागीमा पीडित, शहीद र घाइतेको सङ्ख्या करिब ६१ जना पुगेको छ’, वासित प्रान्तका गभर्नर मोहम्मद अल–मियाहीले भने ।

आगलागी बुधबार राति शपिङ मलको पहिलो तलाबाट शुरू भएर छिट्टै हाइपर मललाई घेरेको बताइएको छ । आगलागीको कारण खुल्न सकेको छैन ।

एम्बुलेन्सहरूले बिहान ४ बजेसम्म घाइतेहरूलाई अस्पतालमा लगिरहेका थिए । बगदादबाट करिब एक सय ६० किलोमिटर (एक सय माइल) दक्षिणपूर्वमा रहेको कुटको अस्पतालका वार्डहरू भरिएका थिए ।

सरकारले आगामी ३ दिनको शोक घोषणा गरेको छ। यो मल पाँच दिन अघि मात्रै सञ्चालनमा आएको थियो।