सामग्री खोज्नुहोस्

टोकियो । उत्तरी जापानको सेन्दाई क्लासिक गल्फ क्लबमा भइरहेको मेइजी यासुदा लेडिज गल्फ प्रतियोगिता भालु देखिएपछि पुनः रद्द गरिएको छ। बुधबार पहिलो टी नजिक भालु देखिएपछि आयोजकले निर्धारित प्रो–एम प्रतियोगिता र बिहीबारको उद्घाटन दिन दुवै रद्द गर्ने निर्णय गरेका हुन् ।

यो पछिल्लो दुई महिनामा दोस्रोपटक हो जब भालुको उपस्थितिका कारण गल्फ प्रतियोगिता रोकिएको हो। प्रतियोगिताको कुल पुरस्कार राशि १० करोड येन (६ लाख ७० हजार डलर) रहेको छ। आयोजकले बाँकी खेलबारे शुक्रबार निर्णय गर्ने बताएका छन् ।

यसअघि मे महिनामा पनि जापानको अर्को महिला गल्फ प्रतियोगिता ट्विनफिल्ड लेडिज को अन्तिम राउन्ड भालु देखिएपछि रद्द गरिएको थियो । यस्तै, एक महिनापछि विमानस्थलको रनवेमा भालु देखिँदा उडानहरू रद्द भएका थिए।

पछिल्लो वर्ष जापानमा भालुका कारण २१९ मानिसमाथि आक्रमण भएको र ६ जनाको मृत्यु भएको तथ्यांक सार्वजनिक भएको छ।

वैज्ञानिकहरूका अनुसार जलवायु परिवर्तन, खाद्य अभाव र ग्रामीण क्षेत्रमा जनसङ्ख्या कमीले भालुहरूलाई शहर प्रवेशमा उक्साइरहेको छ।