सामग्री खोज्नुहोस्

काठमाडौं । भोजपुरको रामप्रसादराई गाउँपालिका–२ धोद्लेखानीमा एकै परिवारका चार जनाको हत्या भएको छ ।

शनिबार राति भोजपुर नगरपालिका–२ घर भएका ३० वर्षीय राजेन्द्र राईले १६ वर्षीया श्रीमती मनीषा गिरी, ६८ वर्षीय ससुरा बेलबहादुर गिरी, ४५ वर्षीया सासू मञ्जु गिरी र ९ वर्षीय सालो सपन गिरीको धारिलो हतियार प्रहार गरी हत्या गरेका प्रहरीले जनाएको छ ।

जिल्ला प्रहरी कार्यालयका प्रहरी निरीक्षक दीपक श्रेष्ठका अनुसार उनले घटनापश्चात राई आफैंले प्रहरीलाई फोन गरेर घटनाका बारेमा जानकारी गराएका थिए ।

राईको पनि पेटमा गहिरो चोट लागेको छ ।

जिल्ला अस्पतालमा उपचारपश्चात थप उपचारका लागि उनलाई बाहिर रेफर गरिएको छ । घटनाका विषयमा थप अनुसन्धान भइरहेको छ । प्रहरीले घटनास्थल पुगेर शवको मुचुल्का उठाइरहेको छ ।

आरोपित राई करिब एक हप्ता अघिबाट ससुरालीमा बस्दै आएका रामप्रसादराई–२ का वडासदस्य जीवन जर्गा मगरले जानकारी दिए ।

घरायसी विवादका कारण घटना भएको हुनसक्ने उनको भनाइ छ । थप अनुसन्धान भइरहेको प्रहरीले जनाएको छ।