सामग्री खोज्नुहोस्

एजेन्सी । अफगानिस्तानको सरकारले आफ्नो शासनलाई आधिकारिक रूपमा मान्यता दिने पहिलो देश रुस बनेको भन्दै यसलाई ‘साहसी निर्णय’ भनेको छ ।

विदेशी समर्थित सरकारलाई अपदस्थ गरेपछि र ईस्लामिक कानूनको कठोर सँस्करण लागू गरेपछि तालिबान सन् २०२१ मा सत्तामा फर्किएको थियो ।

सन् १९७९ देखि १९८९ सम्मको सोभियत आक्रमणसहित चार दशकको युद्धबाट देश निको हुँदै जाँदा उनीहरूले आधिकारिक अन्तर्राष्ट्रिय मान्यता र लगानी खोजिरहेका छन् ।

अफगानिस्तानका विदेशमन्त्री अमिर खान मुत्ताकीले बिहीबार काबुलमा अफगानिस्तानका लागि रुसका राजदूत दिमित्री जिरनोभसँग भेट गरेपछि यो घोषणा गरिएको हो ।

‘यो साहसी निर्णय अरूका लागि उदाहरण बन्नेछ… अब जब मान्यताको प्रक्रिया शुरू भएको छ, रुस सबैभन्दा अगाडि थियो’, मुत्ताकीले एक्समा भएको बैठकको भिडियोमा भनेका छन् ।

‘ईस्लामिक इमिरेटलाई आधिकारिक रूपमा मान्यता दिने पहिलो देश रुस हो’, तालिबानको विदेश मन्त्रालयका प्रवक्ता जिया अहमद टकलले आफ्नो प्रशासनका लागि सरकारको नाम प्रयोग गर्दै भने ।

विदेश मन्त्रालयले मुत्ताकीको भनाइ उद्धृत गर्दै एक्समा पोस्ट गरेको छ, ‘यो सकारात्मक सम्बन्ध, आपसी सम्मान र रचनात्मक संलग्नताको नयाँ चरण हो ।’

मन्त्रालयले ‘ऊर्जा, यातायात, कृषि र पूर्वाधार’मा सम्भावित ‘व्यावसायिक र आर्थिक सहयोग’लाई प्रकाश पारेको छ ।