सामग्री खोज्नुहोस्

एजेन्सी । पोर्चुगलका पूर्वप्रधानमन्त्री जोस सुक्रेट्समाथि करोडौं युरो भ्रष्टाचार अभियोगमा मुद्दा दर्ता गरिएको छ।

सन् २००५ देखि २०११ सम्म देशको नेतृत्व गरेका सुक्रेट्सले प्रधानमन्त्री पदमा रहँदा तीन करोड ४० लाख युरो (झन्डै चार करोड अमेरिकी डलर) अवैध रूपमा आर्जन गरेको अभियोग लागेको हो।

अभियोजनका अनुसार उनले बाल्यकालका साथीमार्फत देशको सबैभन्दा ठूलो बैंक र पर्यटन परियोजनामा अनियमितता गरेका थिए। उनीसँगै अन्य १८ जनाविरुद्ध पनि मुद्दा दर्ता गरिएको छ।

यो मुद्दालाई स्थानीय सञ्चारमाध्यमले ‘शताब्दीको सुनुवाइ’ भन्दै आएका छन् । सुक्रेट्सलाई पहिलो पटक १० वर्षअघि पक्राउ गरिएको थियो, तर उनले हालसम्म आफूमाथि लागेका सबै आरोप अस्वीकार गर्दै आएका छन्।

सुक्रेट्स पछिल्लो समय भ्रष्टाचारका कारण कानूनी समस्यामा फसेका पोर्चुगलका उच्च राजनीतिज्ञहरूमध्ये एक हुन्।

मुद्दाको सुनुवाइ केही महिनासम्म चल्ने अनुमान गरिएको छ भने अभियोजन पक्षले २०० जना साक्षी प्रस्तुत गर्ने तयारी गरिरहेको छ।