सामग्री खोज्नुहोस्

एजेन्सी । इजरायलद्वारा इरानको आणविक केन्द्रमा गरिएका आक्रमणपछि चर्किएको तनाव कम गर्न युरोपेली मुलुकहरूले जेनेभामा कूटनीतिक वार्ता शुरू गरेका छन् । फ्रान्स, जर्मनी र बेलायतका नेताहरूले इरानलाई युद्ध होइन, संवादमार्फत समाधानको मार्ग रोज्न आग्रह गरेका हुन् ।

जेनेभामा इरानी विदेशमन्त्री आवास अराघचीसँगको वार्तामा युरोपेली कूटनीतिज्ञहरूले तनाव घटाउने उपाय खोजिरहेका छन् ।

तर इजरायलले वार्तामा भाग नलिएर कडा अडान लिन युरोपेली मुलुकलाई दबाब दिएको छ । इजरायली राजदूत डेनियल मेरोनले इरानसँग आणविक कार्यक्रम र आतङ्ककारी गतिविधि अन्त्यको माग गर्नुपर्ने बताए ।

उता इरानले वार्ताका बीचमा इजरायली आक्रमण भएको भन्दै आक्रोश व्यक्त गरेको छ । यस्तै, इजरायली क्षेप्यास्त्र आक्रमणपछि इरानबाट पनि प्रतिआक्रमण भएको छ। हालसम्म इजरायलमा २५ र इरानमा २२४ जनाको ज्यान गएको पुष्टि भएको छ।

इरान र इराकमा इजरायलविरुद्ध हजारौं नागरिक सडकमै उत्रेका छन् ।

बेलायत र स्विट्जरल्यान्डले सुरक्षा कारणले आफ्नो दूतावास स्टाफ फिर्ता बोलाइसकेका छन् ।

संयुक्त राष्ट्रसंघका महासचिव एन्टोनियो गुटेर्रेसले सबै पक्षलाई शान्तिपूर्ण समाधानका लागि आग्रह गरेका छन् ।

तेलको मूल्यमा उछाल, सेयर बजारमा गिरावट

घटनापछि अन्तर्राष्ट्रिय बजारमा तेलको मूल्य आकाशिएको छ भने अमेरिकी सेयर बजारमा गिरावट आएको छ। विश्लेषकहरूका अनुसार, यो सैन्य उत्कर्षले ग्लोबल आपूर्ति चेनमा गहिरो असर पार्न सक्छ।

अन्तर्राष्ट्रिय समुदायको चासो

यस द्वन्द्वले विश्वभरबाट कूटनीतिक प्रतिक्रिया निम्त्याएको छ। संयुक्त राष्ट्रसंघ, युरोपेली संघ, रुस, चीन र अमेरिकाले दुवै पक्षलाई संयमता अपनाउन आह्वान गरेका छन्। यसबीच, बेलायतले तेहरानस्थित आफ्ना कूटनीतिक कर्मचारीहरू फिर्ता बोलाएको छ।