सामग्री खोज्नुहोस्

एजेन्सी । टर्कीले इरान र इजरायलबीचको हवाई युद्धका कारण आप्रवासनमा वृद्धि हुन सक्ने जनाएको छ । 

टर्कीका राष्ट्रपति रेसेप तैयप एर्दोगानले युद्धका कारण आप्रवासनमा वृद्धि हुन सक्ने तथा युरोप र यस क्षेत्रलाई हानि पुर्‍याउन सक्ने चेतावनी दिएका हुन् । 

इरानले आणविक अस्त्र विकास गर्न लागेको भन्दै इजरायलले एक साताअघि ठूलो सङ्ख्यामा हवाई आक्रमण गरेपछि इरानले गरेको प्रतिकारका कारण युद्ध चर्किएको छ । 

जर्मनीका चान्सलर फ्रेडरिक मर्जसँगको टेलिफोन वार्तामा गरिएको उनको भनाइ उद्धृत गर्दै एर्दोगानको कार्यालयले भनेको छ, ‘इजरायलको आक्रमणले निम्त्याएको हिंसाको चक्रले यस क्षेत्र र युरोपलाई आप्रवासन समस्या बढाउने र आणविक चुहावटको सम्भावना रहने भएकाले यो युद्धले युरोपलाई व्यापक प्रभाव पार्नसक्छ ।’

एर्दोगानले इरानसँगको आणविक असहमतिको समाधान ‘वार्ताबाट’ मात्रै हुने बताएका छन् ।

हिंसाले क्षेत्रीय सुरक्षाका लागि खतरालाई उच्च स्तरमा पुर्‍याएको र टर्कीले ‘द्वन्द्व अन्त्यका लागि प्रयास गरिरहेको’ उनले बताए ।

बढ्दो द्वन्द्वका बाबजुद टर्कीको रक्षा मन्त्रालय स्रोतले बिहीबार इरानबाट बाहिरिने सङ्ख्यामा ‘कुनै वृद्धि’ नभएको बताएको छ ।
 
टर्कीका अधिकारीहरूले यस दावीलाई पुष्टि गर्ने कुनै तथ्याङ्क सार्वजनिक गरेका भने छैनन्।

टर्कीको पूर्वी शहर वान नजिकैको मुख्य कापिकोय सीमा नाकामा एएफपीका संवाददाताहरूले दुवै दिशाबाट सयौं मानिस पार गरेको देखेको बताएका छन्।