सामग्री खोज्नुहोस्

टोकियो । चीनले जापानबाट आयात गरिने समुद्री खाद्य पदार्थमा लगाएको प्रतिबन्ध हटाउने निर्णय गरेको छ।

फुकुशिमा डाइइची परमाणु ऊर्जा केन्द्रबाट समुद्रमा प्रशोधित फोहर पानी फालिएको विषयसँग सम्बन्धित रहेर लगाइएको प्रतिबन्ध अब हटाइने भएको हो।

दुवै देशबीचको सहमतिपछि अब जापानी समुद्री उत्पादनको निर्यात पुनः शुरू हुनेछ। यो सहमति शुक्रबार सार्वजनिक गरिएको हो।

जापानका प्रमुख क्याबिनेट सचिव योशिमासा हयाशीले जानकारी दिएअनुसार, निर्यात अघि जापानले चीनमा पठाउन तयार उत्पादन केन्द्रहरूको दर्ता प्रक्रिया पूरा गर्नुपर्नेछ।

साथै, निर्यात हुने खाद्य पदार्थमा रेडियोधर्मी सेसियम र आयोडिनको परीक्षण प्रमाणपत्र, उत्पत्ति प्रमाणपत्र र स्वच्छता प्रमाणपत्र संलग्न गरिनुपर्नेछ। यी मापदण्डहरू फुकुशिमाबाट पानी विसर्जन हुनु पूर्वदेखि नै लागू थिए।​

हयाशीले यस सहमतिलाई ‘महत्वपूर्ण उपलब्धि’ भन्दै स्वागत गरेका जापान टाइम्सले जनाएको छ ।

उनले जापानी गाईको मासु तथा १० वटा प्रान्तका कृषि तथा समुद्री उत्पादनमा चीनले लगाएको अन्य प्रतिबन्ध हटाउन पनि जापानले दबाब दिइरहने बताए। साथै, हङकङ र दक्षिण कोरियाजस्ता अन्य मुलुकले लगाएका आयात प्रतिबन्धहरू हटाउन पनि जापानले प्रयास गर्ने जनाइएको छ।