Kyodai News

एजेन्सी । केन्याको राजधानी नैरोबीको एक अनौपचारिक वस्तीमा शनिबार आगलागी हुँदा कम्तीमा आठ जनाको मृत्यु भएको प्रहरीले जनाएको छ ।

स्थानीय समयअनुसार बिहान ५ बजेतिर शहरको माकिना क्षेत्रमा आगलागी शुरू भएको प्रहरी अधिकारी पेट्रिसिया येगोनले जानकारी दिए ।

उनले भने, ‘आगलागीमा आठ जनाको जलेर मृत्यु भएको छ भने कैयौं घाइते भएका छन् । घाइतेहरूलाई विभिन्न स्थानमा राखी उपचार भइरहेकाले घाइते हुने व्यक्तिको स्पष्ट सङ्ख्या अझै सङ्कलन भइरहेको छ ।’

आगलागी कसरी शुरू भयो यसबारे कारण खुल्न सकेको छैन । राजधानीका भीडभाड र विपन्न अनौपचारिक बस्तीहरूमा बारम्बार डढेलो लाग्ने गर्छ ।

केन्याली रेडक्रसका अनुसार स्थानीय समुदायको सहयोगमा अग्नि नियन्त्रकहरूले आगो नियन्त्रणमा लिनुअघि ४० घर प्रभावित भएका थिए।