सामग्री खोज्नुहोस्

एजेन्सी । रुसी राष्ट्रपति भ्लादिमिर पुटिन टर्कीको इस्तानबुलमा बिहीबार हुने बैठकमा सहभागी नबन्ने भएका छन् ।​ ​युक्रेन युद्धसम्बन्धी शान्ति वार्ताका लागि इस्तानबुलमा हुने बैठकमा सहभागी हुने क्रेमलिनको सूचीमा उनको नाम नपरेको पुष्टि भएसँगै उनी सो बैठकमा सहभागी नबन्ने पुष्टि भएको हो । यद्यपि युक्रेनी राष्ट्रपति भोलोडिमिर जेलेन्स्कीले पुटिनसँग प्रत्यक्ष भेटवार्ता गर्ने प्रस्ताव राखेका थिए।​

क्रेमलिनद्वारा जारी विज्ञप्ति अनुसार, उक्त वार्तामा रुसी प्रतिनिधिमण्डलको नेतृत्व राष्ट्रपति पुटिनका सहयोगी भ्लादिमिर मेदिन्स्कीले गर्नेछन्।

जेलेन्स्कीले यसअघि नै भनेका थिए कि यदि पुटिन तयार भएमा उनी शान्ति वार्तामा सहभागी हुनेछन् र प्रत्यक्ष भेटका लागि जुनसुकै प्रयास गर्न तयार रहेका बीबीसीले जनाएको छ ।

अमेरिकी राष्ट्रपति डोनाल्ड ट्रम्प पनि वार्तामा सहभागी नहुने भएका छन्। मिडिया रिपोर्टहरू अनुसार, उनले पुटिन सहभागी भए मात्र आफू जाने संकेत गरेका थिए।

यसबीच, युक्रेनी राष्ट्रपति जेलेन्स्की बिहीबार टर्कीको राजधानी अङ्कारा पुगेर राष्ट्रपति रेचेप तैयप एर्दोआनसँग भेटवार्ता गर्नेछन्।

जेलेन्स्कीले भनेका छन्, ‘रुसबाट को आउँछ भन्ने कुरामा म प्रतीक्षा गर्दैछु, त्यसपछि मात्रै युक्रेनले कुन कदम चाल्ने भन्ने निर्णय हुनेछ। अहिलेका लागि उनीहरूबाट आएका सन्देशहरू विश्वसनीय देखिँदैनन्’, उनले बुधबार राति जारी भिडियो सन्देशमा भनेका थिए।