सामग्री खोज्नुहोस्

टोकियो। टोकियो वरपर चल्ने नाम्बोकु लाइनको तोदाई-माए स्टेशनमा ट्रेन चढ्ने तरखरमा रहेका एक बिद्यार्थी माथि चक्कु प्रहार भएको छ। बुधवार बिहान ट्रेन चढ्न लागेका बिद्यार्थी माथि अपरिचित व्यक्तिले चक्कु प्रहार गरेको एनएचकेले जनाएको छ।

अपरिचित व्यक्तिले चक्कु प्रहार गर्न थालेपछि ट्रेन भित्रै भागिरहेका बिद्यार्थीलाइ पछ्याउदै बारम्बार उनीमाथि प्रहार गरिएको समाचारहरुमा उल्लेख गरिएको छ। आक्रमण पछि घाइते भएका २० बर्षीय बिद्यार्थीको उपचार भैरहेको छ।

आक्रमण लगत्तै प्रहरीले अभियुक्तलाइ पक्राउ गरी अनुसन्धान गरिरहेको पनि प्रहरीलाइ उदृत गर्दै एनएचकेले समाचार प्रकाशन गरेको छ। आक्रमण बारे अभियुक्तले अहिले सम्म केही नखुलाएको प्रहरीले बताएको छ।

घटना घटाउन भन्दा ३० मिनेट पहिले अभियुक्त स्टेशनमा प्रवेश गरेको खुलेको छ। उनी करिब आधा घण्टा सम्म शौचालय जाने र निस्कने गरेको स्टेसनको सिसि क्यामेरामा कैद भएको फुटेज बाट पुष्टि भएको छ।

आक्रमणको कारण खुलिनसकेको र घटना बारे थप अनुसन्धान भैरहेको प्रहरीले बताएको छ।