सामग्री खोज्नुहोस्

​टोकियो । जापानले चीनविरुद्ध बनेको कुनै पनि अमेरिकी नेतृत्वको व्यापारिक गठबन्धनमा सामेल हुन प्रतिरोध गर्ने जनाएको छ। टोकियोका लागि चीनसँगको व्यापारिक सम्बन्ध अत्यन्त महत्वपूर्ण रहेको भन्दै जापानले यस्तो निर्णय गरेको हो।

जापान सरकारका हालका तथा पूर्व अधिकारीहरूले अमेरिकी सञ्चारमाध्यमलाई जानकारी दिँदै भनेका छन् कि जापान अहिले राष्ट्रपति डोनाल्ड ट्रम्पले गरेको भन्सार शुल्क (ट्यारिफ)बाट स्थायी छुट पाउने प्रयासमा केन्द्रित छ। त्यसका लागि जापानले द्विपक्षीय व्यापारका क्षेत्रमा, विशेषगरी अटोमोबाइल र कृषि उत्पादनसम्बन्धी चिन्ताहरू सम्बोधन गर्दैछ।

ती अधिकारीहरूका अनुसार, जापानले हाल लागू भएको ९० दिनको भन्सार छुट अवधि सकिनुअघि अमेरिका सँग सम्झौता गर्न चाहन्छ। एक जना अधिकारीले भनेका छन् कि जापानले आगामी जुन महिनामा हुने समूह-७ (जी-७) सम्मेलनसम्ममा सम्झौता टुंग्याउने लक्ष्य लिएको छ।

यद्यपि, अधिकारीहरूले प्रस्ट पारे अनुसार जापान कुनै हालतमा अमेरिकाको चीनमाथि व्यापारिक दबाब बढाउने रणनीतिमा फस्न चाहँदैन।

चीन हाल जापानको सबैभन्दा ठूलो व्यापारिक साझेदार हो र आवश्यक वस्तु तथा कच्चा पदार्थको प्रमुख आपूर्तिकर्ता पनि हो। त्यसैले चीनसँगको आर्थिक सहकार्य घटाउने कुनै अमेरिकी दबाबलाई जापानले स्वीकार नगर्ने जनाएको छ।