सामग्री खोज्नुहोस्

काठमाडौं । नेपाल सुपर लिग (एनएसएल) फुटबल प्रतियोगिताको तेस्रो संस्करणको उपाधि साविक विजेता ललितपुर सिटी एफसीले जितेको छ।

शनिबार त्रिपुरेश्वरस्थित दशरथ रंगशालामा सम्पन्न फाइनल खेलमा ललितपुरले पोखरा थन्डर्सलाई २–१ ले पराजित गर्दै उपाधि रक्षा गरेको हो।

उपाधिसँगै ललितपुरले ८० लाख रुपैयाँ पुरस्कार प्राप्त गर्‍यो भने उपविजेता पोखराले ३० लाख रुपैयाँमा चित्त बुझायो।

ललितपुरका लागि इमोह इजाकियल र पापा इबाउ केबेले गोल गरे। खेलको ४२औँ मिनेटमा इजाकियलले गोल गर्दै पहिलो हाफमा ललितपुरलाई १–० को अग्रता दिलाए। दोस्रो हाफको ६४औँ मिनेटमा पोखराका सुदील राईले बराबरी गोल गरे। तर, खेलको ७४औँ मिनेटमा पापा इबाउले निर्णायक गोल गर्दै ललितपुरलाई जित दिलाए।

यस पटक ललितपुर प्रतियोगिताभर अपराजित रह्यो। समूह चरणमा ३ जित र ३ बराबरीसहित १२ अंक जोड्दै शीर्ष स्थानमा रह्यो। ललितपुरले पहिलो क्वालिफायरमा धनगढी एफसीलाई २–१ ले हराउँदै फाइनल यात्रा तय गरेको थियो।

पोखरा थन्डर्सले समूह चरणमा २ जित, २ बराबरी र २ हारसहित ८ अंक जोड्दै प्लेअफमा पुगेको थियो।

इलिमिनेटरमा चितवन च्यालेन्जर्सलाई ३–० ले र दोस्रो क्वालिफायरमा धनगढीलाई १–० ले पराजित गर्दै फाइनल स्थान सुरक्षित गरेको थियो।