सामग्री खोज्नुहोस्

एजेन्सी । कङ्गोमा इन्धन बोकेको डुङ्गामा आगलागी हुँदा मृत्यु हुनेको संख्या १४८ पुगेको छ ।

यो दुखद दुर्घटना इक्वेटोर प्रान्तको राजधानी म्बान्डाका नजिकै, विश्वकै सबैभन्दा गहिरो र विशाल कङ्गो नदीको सङ्गम स्थलमा भएको हो ।

स्थानीय नागरिक समाजका नेता जोसेफ लोकोन्डोका अनुसार केहीको मृत्यु आगोमा जलेर र केहीको डुबेर भएको पुष्टि भएको छ । उजले अझै कैयौं बेपत्ता रहेको बताए ।

डुङ्गामा खाना पकाउने क्रममा लागेको आगो इन्धनमा फैलिँदा ठूलो विस्फोट भई आगलागी भएको थियो ।

सामाजिक सञ्जालमा सार्वजनिक भिडियोहरूमा डुङ्गाबाट आगो सल्किरहेको र बाक्लो धुवाँ निस्किरहेको देखिन्छ । डुङ्गा किनाराबाट निकै टाढा फसेको अवस्थामा देखिएको छ ।

घाइतेहरूलाई उद्धार गरी अस्पतालमा उपचारका लागि पठाइएको जनाइएको छ । धेरै परिवारहरू अझै पनि आफ्ना हराएका आफन्तको अवस्थाबारे अनभिज्ञ छन् ।