सामग्री खोज्नुहोस्

एजेन्सी । दक्षिण लेबनानमा सोमबार भएको इजरायली आक्रमणमा हिजबुल्लाहका एक उच्चस्तरीय तोपखाना कमान्डरको मृत्यु भएको इजरायली सेनाले दाबी गरेको छ।

गत नोभेम्बर २७ मा युद्धविरामको घोषणा भए पनि इजरायल र इरान-समर्थित हिजबुल्लाहबीच सीमावर्ती क्षेत्रमा झडप जारी रहँदै आएको छ।

इजरायली सेनाका अनुसार उक्त कमान्डर इजरायलको उत्तरी गालील क्षेत्रतर्फ क्षेप्यास्त्र प्रहार गर्ने आक्रमणमा संलग्न थिए।

लेबनानको स्वास्थ्य मन्त्रालयले जारी गरेको विज्ञप्तिमा, सोमबार तैबेह शहरमा इजरायली आक्रमण हुँदा एक नागरिकको मृत्यु भएको पुष्टि गरिएको छ। सरकारी समाचार संस्था एनएनएका अनुसार, उक्त आक्रमण मोटरसाइकल मर्मत केन्द्र अगाडि भएको थियो।

यसअघि आइतबार पनि दक्षिण लेबनानको जिबकिन क्षेत्रमा इजरायली आक्रमणमा परी दुई जनाको मृत्यु भएको थियो। इजरायली सेनाले ती आक्रमणहरू हिजबुल्लाहका लडाकूहरूलाई लक्षित गरी गरिएको दाबी गर्दै आएको छ।