सामग्री खोज्नुहोस्

एजेन्सी । म्यानमारमा शुक्रबार आएको ७.७ म्याग्निच्युडको भूकम्पमा परी मृत्यु हुनेको सङ्ख्या २,०५६ पुगेको छ। घटनामा ३ हजार ९०० भन्दा बढी घाइते भएका छन् भने अझै २७० जना हराइरहेका छन्, जसले मृतक सङ्ख्या अझै बढ्न सक्ने अनुमान गरिएको छ।

सरकारले अप्रिल ६ सम्म राष्ट्रिय शोक घोषणा गर्दै झन्डा आधा झुकाउने निर्णय गरेको छ। भूकम्पबाट दोस्रो ठूलो सहर मण्डले गम्भीर रूपमा प्रभावित भएको छ।

हजारौं मानिस तीन दिनदेखि सडकमा रात बिताउन बाध्य छन्। अस्पतालहरू क्षतिग्रस्त भएका कारण पार्किङस्थलमा बिरामीको उपचार भइरहेको छ।

भूकम्पको असर छिमेकी देशहरूमा समेत परेको छ। थाइल्यान्डको राजधानी बैङ्ककमा एक ३०-तले भवन भत्किँदा १९ जनाको मृत्यु भएको छ। मृतक मध्ये तीन जना चिनियाँ र दुई जना फ्रान्सेली नागरिक रहेको बताइएको छ। 

चार वर्षदेखि गृहयुद्ध झेलिरहेको म्यानमारले अन्तर्राष्ट्रिय सहायता मागेको छ। विश्व स्वास्थ्य सङ्गठनले ८ लाख अमेरिकी डलर सहायता आवश्यक पर्ने जनाएको छ भने रेडक्रसले १०० मिलियन डलरभन्दा बढी सहयोगको अपिल गरेको छ।