सामग्री खोज्नुहोस्

टोकियो । म्याग्दी प्रवासी नेपाली संघ (मोना) जापान क्षेत्रीय समिति नागोयाले जापानी भाषा निबन्ध लेखन प्रतियोगिता आयोजना गर्ने भएको छ ।

जापानमा रहेका नेपाली विद्यार्थीको भाषागत क्षमताको विकासमा टेवा पुर्र्याउने उद्देश्यका साथ निबन्ध (साकुबुन) लेखन प्रतियोगिताको आयोजना गर्न लागिएको आयोजकले जनाएको छ ।

प्रतियोगिता मार्फत् वीरगञ्ज कृषि औजार कारखानालाई समेत सहयोग गर्ने कार्यक्रम संयोजक सागर थापा बगालेले बताए । प्रतियोगितामा जापानी भाषा विद्यालय, भोकेसनल विद्यालय र विश्वविद्यालयमा अध्ययन गर्दै गरेका विद्यार्थीले सहभागिता जनाउन सक्ने बगालेले जानकारी दिए ।

निबन्ध लेखन प्रतियोगिताका लागि विषयवस्तुको छनोट स्वतन्त्र रहेको छ । विषयवस्तुको छनोट गर्दा राजनीतिक, धार्मिक, सामाजिक आस्था माथि प्रहार हुने विषयवस्तु समेट्न नपाइने उनले बताए ।

प्रतियोगिले आगामि अप्रिल १ तारिखदेखि १० तारिखसम्म मोना जापानलाई मेल मार्फत् आवेदन दिन सक्ने आयोजकले जनाएको छ । मेलमा आफ्नो नाम, सम्पर्क नम्बर, नेपाल र जापानको ठेगना साथै जापानमा अध्ययनरत् विद्यालयको नामसहित आफ्नो निबन्ध (साकुबुन) पडिएफ मार्फत् पठाउनु पर्ने छ । उक्त साकुबुन ६ सय देखि ८ सय शब्दसम्मको हुनु पर्ने छ ।

प्रतियोगिको आवेदहरु मार्फत् निर्णयक समितिले उत्कृष्ट ५ जनालाई छनोट गर्ने मोना जापान क्षेत्रीय समिति नागोयाका सचिव सागर भण्डारीले जानकारी दिए । भौतिक कार्यक्रम नागोयामा हुने आयोजक समितिले जनाएको छ ।

प्रतियोगितामा प्रथम हुनेले १ लाख जापानी येन, द्धितीय हुनेले ७० हजार येन र तृतीय हुनेले ५० हजार येन नगद पुरस्कार साथै प्रमाण पत्र प्रदान गरिने जनाइएको छ । साथै भौतिक सहभागीका लागि छनोट भएर टाढाबाट आउने विद्यार्थीलाई आयोजक समितिले यातायात खर्च स्वरुप २० हजार जापानी येन उपलब्ध गराउने जनाएको छ ।