सामग्री खोज्नुहोस्

काठमाडौं । नेपाल पत्रकार महासंघले क्योदाई न्यूजका प्रधान सम्पादक दीपक गौतमलाई भौतिक आक्रमणको धम्की दिनेलाई कारबाहीको माग गरेको छ ।

प्रधान सम्पादक गौतमलाई केबीएल इन्टरनेसनल कम्पनीका अध्यक्ष कुमार कार्कीले समाचारको विषयलाई लिएर दिएको धम्कीप्रति गम्भीर ध्यानाकर्षण जनाउँदै महासंघले कारबाहीको माग गरेको हो । 

कुमार कार्कीको कम्पनीले नक्कली सीओई बनाएर नेपालबाट जापान मान्छे पठाउने गरेको विषयमा क्योदाई न्यूजमा समाचार प्रकाशित भएको थियो ।

यही समाचारलाई लिएर फागुन १२ गते सोमबार अध्यक्ष कार्कीले सामाजिक सञ्जालमार्फत गालीगलौज गर्दै पत्रकार गौतमलाई भौतिक कारबाहीको धम्की दिएका थिए ।

महासंघले प्रकाशित समाचारप्रति असहमति वा गुनासो रहे कानूनी बाटो अपनाउन सकिने हुँदा पत्रकारलाई यसरी धम्क्याउनु प्रेस स्वतन्त्रतामाथिको गम्भीर प्रहार भएको जनाएको छ ।

महासंघले प्रेस स्वतन्त्रता विरोधी यो कार्यको कडा भर्त्सना गर्दै धम्की दिने व्यक्तिमाथि कानूनी कारबाहीको प्रक्रिया अघि बढाउन र पत्रकारहरूको सुरक्षित वातावरण निर्माण गर्न सम्बन्धित निकायसँग माग गरेको छ ।

यसअघि नेपाल पत्रकार महासंघ, जापान शाखालगायतले पनि क्योदाई न्यूजका प्रधान सम्पादक गौतमलाई आक्रमणको धम्की दिनेलाई कारबाहीको माग गर्दै घटनाको भर्त्सना गरेका थिए ।